Коронавирус пандемиясы күшейткен саналы тұтыну тренді қарқын алып келе жатыр деп нық сеніммен айтуға болады. Еліміздегі белсенді маркетплейс саналатын OLX сервисінің деректері бойынша азаматтар «Сыйға беремін» санатындағы хабарландырулардың саны артып келеді. Бұл үрдіс үшінші жыл қатарынан сақталып отыр.
Өткен жылдың сәйкес кезеңімен салыстырғанда, осы санаттағы хабарландырулар саны 3%-ға өсті, ал алдыңғы есепті жылдары өсім сәйкесінше 5% және 10%-ды құрады.
«Еліміздегі мұндай үрдіс мәжбүрлі оқшаулау кезеңінде ерекше танымалдылыққа ие болды. Сірә, пандемия саналы сатып алудың өсуіне және заттарға ұқыпты қарауға түрткі болған сияқты. Биыл тұрғындар ересектер мен балаларға арналған заттарды, сондай-ақ үй мен бақшаға арналған тұрмыстық ыдыстарды сыйға тартуға дайын. Бұл экономикалық тұрақсыздыққа және мұқтаж жандарға барынша көмек көрсетуге деген ұмтылысқа байланысты болуы мүмкін», деп мәлімдейді сервис сарапшылары.
Отандастарымыз кеңсе тауарлары мен электр құралдарынан бастап жиһаз гарнитуралары мен тұрмыстық техникаға дейін тегін беруге дайын екен.
Сарапшылар қай қаланың тұрғындары көбіне заттарды өтеусіз пайдалануға беретінін анықтап білді. Шеринг контексіндегі ең саналы қала – Павлодар. Бұл шаһардағы хабарландырулардың жалпы санының 3%-ын сыйлық ретіндегі хабарландырулар құрайды.
Еліміздің оңтүстік өңірі үшін бейтаныс адамдарға шеринг аса тән емес: Қызылорда, Шымкент және Түркістан қалаларында «Сыйға беремін» санатындағы хабарландырулар осы қалалардағы барлық хабарландырудың 1%-ынан аспайды. Мүмкін, оңтүстік аймақта хабарландыру қызметіне жүгінбестен жақын және таныс адамдармен бөлісу және оларға көмектесу әдетке айналған болар.
