Форум бизнес-қоғамдастық арасындағы іскерлік байланысты дамытуға және екі мемлекет арасындағы сауда және инвестиция саласындағы ынтымақтастықты нығайтуға бағытталған. Цифрлық даму, инновациялар және аэроғарыш өнеркәсібі вице-министрі Асқар Жамбақин атап өткендей, Түркия – еліміздің ең басым сауда-экономикалық және инвестициялық серіктестерінің бірі. Соның ішінде ІТ саласының әлеуеті зор.
Екі күндік форумда қазақ және түрік бизнес-делегациялары бетпе-бет дидарласу, коллаборация мен ынтымақтастық перспективаларын талқылау үшін жеке келіссөздер жүргізуге мүмкіндік алды.
– Біз қазақстандық компаниялармен ынтымақтастықты нығайту үшін B2B кездесулерін ұйымдастырдық. Дәл осындай шара Алматыда да өтті. Форумның нәтижесінде жаңа келісімшарттар жасалып, жергілікті компаниялармен ұзақ мерзімді ынтымақтастық орнатылды, – деді «Bilkent CYBERPARK» бас директоры Фарук Иналтекин.
Келіссөздер бағдарламалық қамтамасыз ету, IoT, портал әзірлеу, энергетикалық мониторинг және басқару, автоматтандыру, смарт қала шешімдері, жасанды интеллект, машиналық оқыту, мобильді қосымша, финтех, цифрлық трансформация, өнімділік, смарт үй жүйесі, қорғаныс өнеркәсібі, географиялық ақпараттық шешімдер, IT, электронды құжат айналымы, электронды қолтаңба шешімдері, денсаулық саласы секілді бизнес-санаттарды қамтығанын айта кетейік.
– Біз жуырда министр Бағдат Мусин бастаған үлкен делегацияның құрамында Түркияның технологиялық кәсіпкерлік экожүйесінде маңызды орын алатын «Bilkent Cyberpark»-те болдық. Бұл жолғы форум – «Digital Bridge» халықаралық форумында қол қойылған меморандум аясындағы серіктестігімізді одан әрі дамытудың тағы бір дәлелі, – деді отандық технопарк экожүйесін таныстыру барысында «Astana Hub» бас директоры Мағжан Мәдиев.
Еске сала кетейік, 2022 жылдың 28 қыркүйегінде «Digital Bridge» халықаралық форумының алаңында түркі елдерінің технопарктері – «Bilkent Cyberpark» (Түркия), «Astana Hub» (Қазақстан), «Sabah Lab» (Әзербайжан), «ПВТ» (Қырғызстан), «Bilisim Vadisi» (Түркия), «IT Park Uzbekistan» (Өзбекстан) ынтымақтастық туралы меморандумға қол қойған болатын. Аймақтағы ақпараттық-коммуникациялық технологиялар мен инновациялық экожүйені бірлесіп дамытуға бағытталған бұл келісім Түркі мемлекеттері ұйымының сегізінші саммитінде Түркі елдерінің заманауи технопарктер орталығын құруды ұсынған ел Президенті Қасым-Жомарт Тоқаевтың бастамасы аясында жасалған еді.
