Елбасы Нұрсұлтан Назарбаев Алматы облысының Талғар ауданындағы «Байсерке-Агро» ЖШС-інде болды.
Негізі 2002 жылы қаланып, үш сала – мал шаруашылығы, ветеринария және егіншілікпен айналысатын бұл ұжымда 300-ден астам адам еңбек етеді. 43 332 га жері бар. Серіктестік мал өсіріп, егін салып, сүт пен ет өнімдерін өңдеп, жақсы жетістіктерге жетіп жүр. Айталық, 2013 жылы 698 млн. теңгенің өнімдерін өндірді. Нақтылай түссек, салған егіннің әр гектарынан 26,2 центнерден өнім алды. Бүгінгі таңда 2218 бас ірі қара, 9243 қой-ешкі, 573 жылқы, 149 бас түйе өсіруде.
Ірі қараның сүт бағытындағы «қара ала сиыр», «голиштино-фрис» асыл тұқымды сиырларынан 7500 литр сүт сауады. Уақыт талабына сай италиялық «megatex» атты қондырғымен сауған сүттерінен өздерінің арнайы цехында сүт өнімдерін – айран, ірімшік, кілегей, йогурт, сары май шығарады. Былтырғы жылы 8148 тонна өнім өндіріп, 18,6 млн. теңгеге сатты. «Қазақтың құйрықты қойы» және «етті-меринос» асыл тұқымды қойларын өсіріп, сапа жетістігімен биікке көтерілгені өз алдына.
Ал жылқы малын екі бағытта бағады. Асыл тұқымды сәйгүліктер ат жарыстарына және ат спорты ойындарына қосу үшін дайындалады. Түйе мен құс та табыс көзін еселеуде.
«Байсерке-Агро» ЖШС еліміздегі ең ірі мегаполис – Алматы қаласына жақын орналасқандықтан, өндірген өнімдерін бірден ірі супермаркеттер мен арнайы тапсырыс беріп сатып алатын сауда орындарына өткізеді. Бұл – екі жаққа да тиімді. Әсіресе, әдемі исі танау жаратын сары уыз секілді сүт өнімдеріне сұраныс күннен күнге арта түсуде. Олай болатыны мал азығы да экологиялық таза аймақта дайындалып берілетіндіктен, оның өтеуі сапалы сүт және ет өнімдерімен қайтарылуда.
Бұл өндіріс орнында сан алуан түрлі көкөніс те өсіріліп, саудаға шығарылады. Қорыта айтқанда, халықтың сұранысы күннен күнге артып, тіпті, «Байсерке-Агро» ЖШС өнімдерін экспортқа шығару жолдары да қарастырылуда.
Мемлекет басшысы осында болған кезінде шаруашылық базасында Қазақ ұлттық ауыл шаруашылығы университетімен бірлесіп құрған «Байсерке-Агро» ғылыми-өндірістік оқыту орталығы жұмысымен танысты.
Қазақстан Президентіне дәнді дақылдардың жаңа сорттары, пестицидтер мен биотыңайтқыштардың сан алуан түрі, сондай-ақ, Қазақстан ғалымдары «Байсерке-Агро» ҒӨОО базасында жасап шығарған ветеринарлық препараттар көрсетілді. Сонымен қатар, Нұрсұлтан Назарбаев ауыл шаруашылығы техникасының жетілдірілген әрқилы түрлері мен мал шаруашылығы нысандарын аралап көрді.
Мемлекет басшысы отандық жоғары оқу орындары оқыту үдерісін ғылыммен және өндіріспен ұштастыру тәжірибесін қолдануы қажеттігіне назар аударды.
– Барлық университеттер ғылыммен айналысуға тиіс. Оларда зертханалар ашып, кейін өндіріс ұйымдастыру үшін қажет болатын тәжірибелік-өнеркәсіптік жұмыстарды жүргізуге арналған техникалық база құрған жөн, – деді Нұрсұлтан Назарбаев.
Мемлекет басшысы елдегі ауыл шаруашылығы кешенін тиімді дамыту ісі бұл салада заманауи ғылыми әдістемелер мен әзірлемелерді қолдануды талап ететінін айтты.
– Азық-түлік өндірісі елімізді дамытудың басты факторына айналып келеді. 2050 жылға қарай әлемде халық саны 9 миллиардқа дейін өседі, ол ауыл шаруашылығы өнімдерін өндіруді екі есеге арттыруды қажет ететін болады. Қазақстанның, орасан кең алқаптарды қоса алғанда, сол орынды иеленуге барлық мүмкіндігі бар. Бұл ретте, ауыл шаруашылығы жаңа технологиялардың көмегінсіз одан әрі дами алмайды. Ғылымның бар күшін пайдалану керек, тек сонда ғана біз ауыл шаруашылығы саласында ілгерілей аламыз, – деді Қазақстан Президенті.
«Байсерке-Агро» өндірістік шаруашылығында ауыл шаруашылығы дақылдарын өсіру барысында отандық ғалымдар әзірлеген инновациялық технологиялар белсенді түрде қолданылады. Шаруашылық құрамына екі ветеринарлық патология-анатомиялық зертханасы, жем-шөпті зоотехникалық талдаудан өткізетін зертханасы және агрохимия зертханасы бар ғылыми-өндірістік оқыту орталығы кіреді.
Нұрбол ӘЛДІБАЕВ,
«Егемен Қазақстан».
Алматы облысы,
Талғар ауданы.
Суреттерді түсірген Юрий Беккер.
