Қазір екі елдің қарым-қатынасы «жан-жақты мәңгілік стратегиялық серіктестік» деңгейіне көтеріліп отыр. Сондықтан визалық режім екі ел қатынастарының дамуына кедергі келтірмейді деп айтуға негіз бар. Керісінше, визалық режім халықаралық тәртіпті сақтауға тиімді екенін көрсетеді.
Қазақстан мен Қытай арасындағы экономикалық байланыстар да айтарлықтай дамып келеді. Өйткені бұл байланыс екі елдің бір-біріне қажеттілігі мен ортақ мүддесі негізінде орнаған. Ал көлік транспорт пен логистикалық байланыстары халықаралық сипат алатындықтан, бұл бағыттағы әріптестік визалық режім болсын, болмасын өз ырғағымен дами береді. Оны ешкім де өзгерте алмайды. Дегенмен өз басым кез келген елмен етене байланыс жасауға қатысты саясатта Абай атамыз айтқандай «Ақырын жүріп анық бас, еңбегің кетпес далаға» деген қағидатты ұстануды дәріптеймін.
Нәбижан МҰҚАМЕТХАНҰЛЫ,
Әл-Фараби атындағы ҚазҰУ профессоры,
тарих ғылымдарының докторы