Жалпы, өңірде Жеңістің 78 жылдығын мерекелеу қарсаңында азаматтардың жекелеген санаттарына әлеуметтік көмек көрсетуге жергілікті бюджеттен 222,7 млн теңге көлемінде біржолғы материалдық көмек төлеу жоспарланған. Екінші дүниежүзілік соғысқа қатысушылармен қатар, бұрынғы КСРО-ны қорғау, әскери қызметтің өзге де міндеттерін атқару кезінде жараланған, мертіккен, мүгедек болған – 137, мемлекеттік қауіпсіздік және ішкі істер органдарының басшы және қатардағы құрамында қызмет еткен – 7, сондай-ақ тәжік-ауған шекара учаскесінде тапсырмалар орындаған – 412, Таулы Қарабақта этносаралық қақтығысты реттеуге қатысқан – 64 және басқа да санаттағы әскери қызметшілерге қаржылай материалдық көмек көрсетіледі.
Сонымен қатар жыл басынан облыс бойынша Екінші дүниежүзілік соғысының 10 қатысушысы мен мүгедегіне коммуналдық қызмет (оның ішінде жылыту, ыстық және суық су, газ бен электр тоғы) ақысы үшін ай сайын 3 айлық есептік көрсеткіш мөлшерінде төлем жүргізіледі. Соғысқа қатысушылар мен мүгедектер қажетіне қарай есту аппаратын, санаторлық-курорттық жолдаманы, қоларбаны, балдақты, протездік-ортопедиялық бұйымды, т.б. түрлі техникалық қосалқы, көмекші, гигиеналық құралдарды бірінші кезекте алады.
Майданға Талғар ауданынан 2389 азамат аттанып, оның 1441-і қаза тапқан немесе хабар-ошарсыз кеткен. Ерен ерлік көрсеткен талғарлық Николай Воробьев пен Николай Бедренко Кеңес Одағының Батыры атанған. Ал Василий Бабенко, Михаил Исаев, Алпысбай Қуанышев «Даңқ» орденін алып, ел мерейін үстем еткен.
Осы күні Талғар ауданында Екінші дүниежүзілік соғысқа қатысқан жалғыз ардагер – Легостаев Вячеслав Феодрович қалған. 1923 жылы Талғар қаласында дүниеге келген ол 7 жылдық біліммен 1942 жылдың көктемінде майдан шебіне аттанады. Алғаш Ашхабадтағы жаяу әскер училищесін тәмамдап, Калинин майданына қатысып, Холли, Невель, Великие Луки қалаларын жаудан азат етуде ерлік көрсетеді. Бұдан әрі мотоатқыштар, миноментшілер взводтарының командирі болған В.Легостаев Рудне қаласында ауыр жарақат алып, елге оралады. Талғар қаласындағы ауылшаруашылық техникумын тәмамдап, агроном мамандығы бойынша абыройлы еңбек етеді. Кейін қаржы саласында қызмет ете жүріп, зейнет жасына шыққан соғыс ардагерін ел-жұрты әр кез құрметтейді.
Алдағы күзде 100 жасқа толатын ардагер В.Легостаев Отан соғысының І және ІІ дәрежелі ордендерімен және мерейтойлық медальдармен марапатталған.
Алматы облысы
