Жас отбасылар «Серіктес», «Кім жүйрік?», «Баскетбол», «Боулинг» деп аталатын төрт кезеңнен тұратын бәсекеде бақ сынады. Игі іс-шараның ашылуында сөз алған облыс әкімінің орынбасары Бейсен Тәжібаев байқаудың отбасылық құндылықтарды нығайтудағы маңыздылығына тоқталып, қатысушыларға сәттілік тіледі.
«Мемлекет тұрақты дамуы үшін әр отбасында татулық, бірлік, береке болуы керек. Бұл ретте демографиялық өсімі жоғары Түркістан облысы үшін отбасы құндылықтарын дәріптеудің маңызы зор. Өйткені алтын құрсақты, көпбалалы аналардың басым бөлігі біздің облыста тұрады. Өңіріміз – жастар саны бойынша да алдыңғы қатарда. Қазіргі таңда облыста 4 мыңнан аса отбасы бар және жыл сайын мыңдаған жас шаңырақ көтереді. Бүгін, міне, отбасындағы сыйластық, еңбекқорлық, адамгершілік қасиеттерімен дараланған отбасылар сынға түсіп, өздерінің ұйымшылдығын көрсетіп жатыр», деді Бейсен Дәулетұлы.
Сайыс нәтижесінде отбасындағы жарасымдылығымен ерекшеленіп, ұрпақтар сабақтастығының қайталанбас үлгісін көрсеткендер жүлделі орындармен марапатталды.
Сондай-ақ Созақ ауданы Шолаққорған ауылындағы орталық стадионда мереке қарсаңында аудан әкімдігі мен «Бақ нұры» іскер әйелдер қоғамдық бірлестігінің ұйымдастыруымен алғаш рет қыз-келіншектер арасында жүгіру марафоны ұйымдастырылды. Саламатты өмір салтын ұстану мен бұқаралық спортты одан әрі дамытуға арналған іс-шараға аудан әкімі Мұхит Тұрысбеков қатысып, бүгінде өз ісін дөңгелетіп отырған іскер әйелдер мен отбасылық құндылықтарды сақтауда көпшілікке үлгі болып отырған көпбалалы аналар және қыз-келіншектерден құралған «Бақ нұры» іскер әйелдер қоғамдық бірлестігінің алдағы жұмыстарына сәттілік тілеп, іс-шараның маңызын атап өтті.
Мерекеге орай ұйымдастырылған марафонға ауданда түрлі салада қызмет етіп жүрген 150-ге жуық қыз-келіншек қатысты.
Түркістан облысы
