«Аграрлық несие корпорациясы» бизнес саласында өз идеяларын жүзеге асыра бастаған жастарды қолдау мақсатында жылдық мөлшерлемесі 2,5 пайыздан аспайтын несие беруді бастап кетті. Бес млн теңгеге дейін берілетін арзан несиеге Керекуде үмітті азаматтар көп. Қарыз алушы кепілге жылжымайтын мүлік, ауылшаруашылығы үшін маңызға ие жер телімдерін, арнайы техникаларды қоя алады.
Ерекшелігі, қаражат бес жылға дейінгі мерзімге кез келген мақсатқа беріле береді. Ал мал шаруашылығын дамытқысы келетіндер үшін несиені төлеу мерзімі жеті жылға дейін ұзартылған. Бұған қоса негізгі қарыз бен сыйақыны қайтару бойынша жеңілдік мерзімі қарастырылған. Оған шағын несиені төлеу мерзімінің үштен бір бөлігінен көп емес уақыт белгіленеді.
Өңірлік жұмыспен қамтуды үйлестіру және әлеуметтік бағдарламалар басқармасының мәліметіне сүйенсек, жуықта жастарды жеңілдікті шағын несиелендіру бойынша облыстық комиссияның отырысы өтіп, онда бизнес жобалар іріктелген. Бүгінге дейін 20 үміткерден өтінім түсіпті. Жас кәсіпкерлер жолаушылар тасымалын ұйымдастыру, киім дүкені, жылқы, сиыр және ұсақ мал өсіру бойынша өз жобаларын ұсынған.
Кәсіпкерлікті дамытудың ұлттық жобасы бойынша 2,5 пайыздық шағын несиелер бизнесін жаңадан бастағысы келіп отырғандарға немесе бизнесін жүргізіп жатқан жастарға беріледі. Конкурстық жүйе олардың ішіндегі әлеуеттілерін таңдап алады. 2023 жылға өңірге 785 млн теңге бөлінген. Мамандар бұл сома 157 жас кәсіпкерді қамтуға жеткілікті деп отыр.
Негізі Кәсіпкерлікті дамытудың ұлттық жобасы бұл несиеден бөлек кәсіпкерліктердің өзге де санаттарын қаржыландыруға, несие пайыздарын азайтуға жағдай тудыруда. Мысалы, жүк тасымалымен айналысатын павлодарлық Нариман Мусин алғашқы коммерциялық көлікті несиеге сатып алды. Ол көлікпен жол құрылысына қажет битум тасымалдайтын жоспары бар. Іскерлік байланыстардың кеңеюіне байланысты кәсіпкер «Кәсіпкерлікті дамытудың 2021-2025 жылдарға арналған ұлттық жобасы» бағдарламасы бойынша трактор сатып алуға өтініш білдірген. Сөйтіп, екінші деңгейлі банктен жылдық мөлшерлемесі 21,75 пайызбен несие рәсімдейді. Сайып келгенде кәсіп иесі бұл мөлшерлеменің небәрі 6 пайызын ғана төлейді. Қалған айырманы мемлекет субсидиялап береді. Несиені рәсімдеу кезінде Нариман Сайлауұлының кепілге қойған мүлкі жеткіліксіз болып шыққан. «Даму» қоры оған көмекке келіп, жетпеген кепілдің орнын толтырды.
«Бүгінде біздің бизнесіміздің тұрақты тұтынушылары бар. Жұмысымызда арнайы техникалар өте қажет. Біздің бизнесте бір орында тұрып қалуға болмайды, үнемі шекараны кеңейтіп отырған маңызды. Ең бастысы, көліктердің жағдайын тұрақты қадағалап, клиенттік базаны толтыруымыз керек. Келешекте жағдайымыз жетіп жатса тағы да арнайы көлік құралдарын сатып алатын жоспарымыз бар», дейді ол.
Павлодар облысы
