Бұл мөрді музейге Мұстафа Шоқай ұрпақтарының бірі, журналист Гүлбаршын Зайырова тапсырды. Оның айтуынша, Алаш ардақтысы 1939 жылға дейін құжаттарында өз қолымен осы мөрін басқан. Мұнда оның аты-жөні мен тұрғылықты мекенжайы француз тілінде жазылған.
«Бұл мөрді негізі Мұстафа атамның аяулы жары Мария Шоқай өмірден өтер алдында өзінің рухани баласы Әлім Алматқа тапсырып кеткен. Сонымен қатар Мария әжеміз ол кісіге ерінің жазу машинкасын,отбасылық альбомын, хаттары мен құжаттарын аманат етіп беріпті. Кейін Әлім атамыз бұл заттарды қартайған шағында белгілі шоқайтанушы ғалым Бақыт Садықоваға өз қолымен өткізген. Біз осы музей ашылғанда Бақыт апамызды арнайы іздеп барып, біраз жыл көзінің қарашығындай сақтаған атамның жазу машинкасын алып, осында әкеп қойдық. Енді мөрін әкеліп отырмыз. Бақыт Садықованың шоқайтанудағы еңбегі өте зор. Ол кісіге алғысымыз шексіз», дейді Г.Зайырова.
Одан кейін сөз алған профессор Әбдіжәлел Бәкір түркі әлеміне ортақ тұлғаның қайраткерлігі туралы парасатты ой қозғады. Ал осы іс-шараға сонау Түркиядан келіп қатысқан шоқайтанушы Әбдіуақап Қара Мұстафа Шоқайдың ұлт тәуелсіздігі тарихында орны бөлек тұлға екенін айтты.
«Біз бүгін тәуелсіздігімізге тәубе дейтін болсақ, ол – Мұстафа секілді Алаш арыстарының азаттық жолындағы күресінің жеңісі. Отаршыл елдер Мұстафа Шоқайдан қатты қорықты. Шындығында, Мұстафаны ақтау қажет емес. Оның ешқандай қылмысы жоқ. Тек ұлы тұлға туралы тарихи әділеттілікті орнату керек. Бүгінгі іс-шара – соның бірі көрінісі. Жүз жылдан кейін көрнекті қайраткердің мөрі елорда төріндегі өзінің атындағы мектептің мұражайына тапсырылып отырғаны – әділеттіліктің орнағаны деп білеміз», – деді ғалым.
Сондай-ақ іс-шара аясында Мұстафа Шоқай атындағы мектеп оқушылары әзірлеген алып тұлға өмірінен бір үзік сыр шертетін әдеби-композиция көрсетіліп, «Мен қашанда жан-тәніммен сенімен біргемін» атты көрме ұсынылды.
