Мәселен, 2021 жылы қылмыстық істі тоқтатамын деп алдау арқылы 40 млн теңге пара алған полиция генерал-майоры Б.Биляловқа қатысты тергеу аяқталды. Айыптау актісі прокуратураға жіберілген. Сондықтан Қылмыстық-процестік кодекстің 201-бабына сәйкес тергеу мүддесі үшін өзге ақпарат жария етуге жатпайды.
Сонымен қатар Алматы облысы бойынша Сыбайлас жемқорлыққа қарсы қызмет ТЖМ «Қазселденқорғау» ММ басшыларына қатысты сотқа дейінгі тергеуді аяқтады. Олар орындалған жұмыс актілеріне қол қойғаны және жалпы қамқорлығы үшін кәсіпкерлерден жалпы сомасы 396 млн теңгеге ірі және аса ірі мөлшерде пара алғаны үшін айыпталған болатын. Тергеу сотының санкциясымен күдіктілер қамауда отыр. Қазіргі уақытта қылмыстық іс ҚПК 300-бабы тәртібіне сәйкес сотқа жіберу туралы мәселені шешу үшін Алматы облысының прокуратурасына берілді.
Парақорлық қылмысына қатысты тағы бір оқиға Абай облысында тіркелген. 29 мамырда Абай облысы бойынша Қылмыстық істер жөніндегі мамандандырылған ауданаралық соты Экология, геология және табиғи ресурстар министрлігі Орман шаруашылығы және жануарлар дүниесі комитетінің «Семей орманы» мемлекеттік орман табиғи резерваты» РММ басшылығына және басқа да тұлғаларға қатысты үкім жариялады.
Мемлекеттік мекеменің үш басшысы ұйымдасқан қылмыстық топқа қатысқан және кәсіпкерлерден әр кездері 700 мыңнан 13 млн теңгеге дейін пара алғаны дәлелденген. Кәсіпкерлер заңсыз сыйақыны лауазымды тұлғаларға резерват аумағында санитарлық тазалау мен ағаш кесуге рұқсат бергені, мемлекеттік сатып алу жөніндегі шарттарға кедергісіз қол қойғаны, сондай-ақ жалпы қамқорлығы үшін берген. Резерваттың үш басшысы 10 жылға сотталды, ал бес азамат пара бергені үшін кінәлі деп танылып, бір жарым жылдан үш жарым жылға дейінгі мерзімге бас бостандығынан айырылды. Бұдан кейін сотталған адамдардың бәрі өмiр бойына мемлекеттiк қызметте, жергiлiктi өзiн-өзi басқару органдарында, қаржы ұйымдарында және квазимемлекеттiк секторда еңбек ете алмайды. Үкім заңды күшіне енген жоқ.
Сонымен қатар осыдан бірнеше күн бұрын Антикоррупциялық қызмет Кентау қаласының экс-әкіміне қатысты тергеуді аяқтаған болатын. 2013 жылы ол Премьер-министр Кеңсесінің қызметкері бола отырып, ірі жекеменшік компаниясының меншік иесін жауапты лауазымды адамдарда аса ірі сомада пара беруге көндірген. Осы үшін құрылыс бойынша тендерде жеңісті қамтамасыз етуге уәде береді. Талап етілген соманы алып, өзіне қалдырып, ақшасының бір бөлігін Астана қаласынан жаңа үй, қымбат автокөлік және бірнеше жүк техникасын сатып алуға жұмсаған. Оның әрекеттері аса ірі көлемде пара беруге итермелеу және алаяқтық ретінде сараланып, тергеу сотының санкциясымен ол қамауда отыр. Қазіргі уақытта қылмыстық іс материалдары қабылданған шешімнің заңдылығын тексеру және одан әрі сотқа жолдау үшін Астана қаласының прокуратурасына тапсырылды.
Айта кетейік, Конституцияның 77-бабы 3-тармағының 1-тармақшасына және Қылмыстық-процестік кодекстің 19-бабы 1-бөлігіне сәйкес қылмыстық құқық бұзушылық жасады деген кінәсі дәлелденіп, соттың заңды үкімі шыққанға дейін әрбір адам кінәсіз деп есептеледі.
