Оқушылардың көркемдік, шығармашылық қабілеттерін дамыту, кәсіби бағдарлануын ынталандыру, эстетикалық, гуманистік және патриоттық сезімдерін ояту, балалар көркемсурет мектептерінің рөлін арттыру мақсатындағы байқауда 136 білім алушы бақ сынады. Жас қылқалам шеберлері алдымен аудандық және қалалық іріктеу кезеңінен өтіп, үздік деп танылғандар облыстық кезеңге жолдама алған болатын.
Қатысушылар 45 минут ішінде «Менің елім – менің жерім» тақырыбында классикалық кескіндеме салды. Тақырыптық натюрмортта тұрмыстық заттардың немесе халық қолөнері мен қолөнер бұйымдарының бейнесін кескіндеді. «Таланттар палитрасы» арқылы авангард және эксперименттік кескіндемелер мен композициялық туындысын көрсетті. Сондай-ақ сюжеттік композиция ретінде «Жер бетіндегі үздік демалыс», «Менің әуестігім», «Мен және менің отбасым» тақырыбына сәйкес ойларын сурет арқылы жеткізді.
Қазылар алқасының шешімі негізінде жүлделі орындар анықталып, жеңімпаздарға қаржылай сыйақы табысталды.
Түркістан облысы
