Сонымен қазылардың шешімімен «IoVIT» – «Ең үздік инновациялық стартап», «SkillSat» – «Адамзат үшін аса бағалы жоба» және «Орбитальный экспресс» – «Болашақта ғарышты игеруші» ретінде танылды. Жалпы, жүлде қорындағы 15 мың долларды жеңімпаздар өзара бөліп алды.
– Біздің стартап шағын құрылғылар-наноспутниктерді құрастырып, іске қосу үшін білім беру жинақтарын ұсынады. Бұл идея маған 2019 жылы Байқоңыр ғарыш айлағын алғаш рет көргенде келген-ді. Біз «Space Tech Battle»-ды көптен күттік. Өз электроникасы мен технологияларын пайдаланатын аппараттық стартаптар үнемі көлеңкеде қалатын. Сондықтан «Astana Hub» және Цифрлық даму, инновациялар және аэроғарыш өнеркәсібі министрлігі жоспарлаған осындай іс-шараның жүзеге асырылғанына қуаныштымын. Ол жалғасын тауып, «SpaceTech» акселераторлары пайда болса екен, – деді «SkillSat» негізін қалаушы әрі бас директоры Абылайхан Мұхамеджанов.
Сондай-ақ форумда «Silkway Accelerator Pitch Marathon» барысында алты стартап («BILLZ», «Kid Security», «Trust Contract», «Prosper Pay», «Codify», «Voiceloft») – «Astana Hub» пен «Google for Startups» бірлескен акселерациялық бағдарламасының қатысушылары өз жобаларын инвесторлардың, ірі корпорация мен венчурлық қор өкілдерінің назарына ұсынды.
– «Space Tech» – біздің технопарк үшін басым бағыттардың бірі. Мен осы алаңда екі маңызды іс-шара – «Space Tech Battle» және «Silkway Accelerator Pitch Marathon» өткізуге мүмкіндік берген форум ұйымдастырушыларына алғыс айтамын. Бұл жас компаниялардың өздерін көрсетіп, дамуына тамаша мүмкіндік, – деді «Astana hub» бас директоры Мағжан Мәдиев.
Еске сала кетейік, 2 маусымда Алматыда «Central Eurasian Venture Forum» ұйымдастырылды. Оған инвесторлар, стартаптар және стартап экожүйесінің басқа да өкілдері қатысты. Қысқасы, іс-шара тұтас Орталық Еуразияны қамтыды. Негізгі ұйымдастырушылар – «MOST» холдингі және сингапурлық «Investbank» («Paladigm Capital») платформасы. Форум аясында Цифрлық даму және аэроғарыш өнеркәсібі министрлігі және «Inspirations» серіктестігімен бірлесіп «Astana Hub» халықаралық технопаркі «Space Tech Battle» және «Silkway Accelerator Pitch Marathon» ұйымдастырды. Форумға 400-ден астам стартап және 600 жеке инвесторлар, венчурлық қорлар мен корпорациялардың өкілдері қатысты. Инвестор-стартап кездесулері, стартап жарыстары және келіссөздер барысында стартаптар бірінші кезеңде 8 млн доллар инвестиция тартқанын айта кетейік. Осылайша, былтырғы 5 млн долларлық рекорд жаңартылды.
