Әскер • 14 Маусым, 2023

Командирлердің тәжірибе алаңы

213 рет
көрсетілді
2 мин
оқу үшін

Семейде «Шығыс» өңірлік қолбасшылығының ұйымдастыруымен әскерилер арасында оқу-жаттығу жиыны өтті. Оған Абай облысынан бөлек Павлодар, Өскемен, Курчатов қалаларында орналасқан әскери бөлім командирлері мен орынбасарлары қатысты.

Командирлердің тәжірибе алаңы

Полигон аумағында әске­ри қызметшілердің кәсіби біліктілігін арттырып, шеберлік­терін шыңдауды мақсат тұтқан оқу-жаттығу жиыны үш күнге созылып, жауынгерлер өзара тәжірибе алмасты.

– Оқу-жаттығу жиыны барысында бөлім командирлері мен олардың орынбасарлары бронды тронспортер техника­сын жүргізу, суда жузу, әртүрлі модификациядағы қару-жарақ­пен оқ ату сабақтарын өтті. Бүгінде олар өте жақсы нәтиже көрсетіп жатыр, – деді 5511 әскери бөлім командирінің қару-жарақ жөніндегі орынбасары, майор Аброр Абдуллаев.

Қуатты қарумен жабдық­талған БТР-80 – соңғы үл­гіде жаңартылған техника. Жол талға­майтын көлік ойлы-қырлы жерлермен де, суда да жүре береді. Оны кеңес әскерлері Ауған соғы­сында қолданған. Кейін 90-жыл­дардан бастап Ресей Қа­рулы күштерінің және басқа да бірқатар бұрынғы кеңестік республиканың барлық ірі қа­рулы қақтығыстарында өзінің тиім­ділігін көрсеткен. Оны жүр­гізу де екінің бірінің қолынан келе бермейді.

– Қазіргі уақытта БTР-80-ді суда жүргізу үшін прак­тикалық сабақтар болып жа­тыр. Бұл техника алдынан кезік­кен шұң­қыр ғана емес, өзен секіл­ді кедер­гілерді де оңай еңсе­реді. Суға түспес бұрын оны жақ­сылап тексеріп, барлық люк­терді жабу керек, – дейді 5518 әскери бөлімінің аға механик жүргі­зушісі, сержант Руслан Бекенов.

Оқу-жаттығу жиыны барысында әскери қызметшілерге барлық жағдай жасалған. Тіпті оқу-жаттығудан кейін тыныстау үшін арнайы демалатын орындармен жабдықталған техникалар да бар. Әскери көліктің іші кең әрі барлық заман талабына сай жасақталған.

– Бұл жиынның әскери қыз­мет­шілердің өзара тәжірибе алмасулары үшін маңызы зор. Біз осында келіп, өзімізге көп пайдалы білім алдық. Жаңа машық­тарды меңгердік. Күнделікті қызметте жүргенде оның бәріне көңіл бөлуге мүмкіндік бола бермейді. Ал мына жерде бар назарымызды осыған аударамыз, – дейді 5518 әскери бөлімінің командирі, подполковник Медет Ертайлақов.