Президент • 17 Маусым, 2023

Президент: Түркістан – ұлы дала өркениетінің мызғымас темірқазығы

607 рет
көрсетілді
1 мин
оқу үшін

Түркістанда Президент Қасым-Жомарт Тоқаевтың қатысуымен Ұлттық құрылтайдың «Әділетті Қазақстан – Адал азамат» атты екінші отырысы өтіп жатыр, деп хабарлайды Egemen.kz.

Президент: Түркістан – ұлы дала өркениетінің мызғымас темірқазығы

«Ұлттық құрылтай – халқымызды ортақ мақсатқа ұйыстыратын бірегей құрылым. Мен былтыр наурыздағы Жолдауымда осы құрылтайды шақыру туралы бастама көтердім. Бұл қадам қоғамдық диалогты нығайта түсу үшін жасалды. Сондай-ақ мұнда ұлттың болашағына ықпал ететін елдік мәселелер талқыланады.

Біз құрылтайдың алғашқы отырысын осыдан дәл бір жыл бұрын Ұлт ұясы – Ұлытауда өткіздік. Көптеген маңызды істер мемлекеттігіміздің негізі қаланған қастерлі өлкеден бастау алды. Осы игі үрдіс биыл да жалғасын тауып жатыр», деді Президент.

Бұдан соң, Мемлекет басшысы Түркістанның ел тарихындағы рөлін атап өтті.

«Бүгінгі басқосу бүкіл түркі халықтары үшін киелі шаһарда өтіп жатыр. Халқымыз әдетте Түркістанды қазақтың рухани астанасы дейді. Дегенмен, қаланың мән-маңызы бұдан әлдеқайда жоғары. Киелі шаһар еліміздің тарихында айрықша рөл атқарған. Көне заманнан бері Ұлы Жібек жолының бойындағы ірі қала болған. Бауырлас халықтардың бәріне ілім-білім таратқан руханият ошағы саналған. Сондай-ақ қазақтың тарихында өшпес із қалдырған көптеген тұлғаларымыз осы жерден мәңгілік мекенін тапқан. Шежірелі шаһардың қабырғасына қазақтың жылнамасы түгел жазылған деуге болады. Шын мәнінде, киелі Түркістан – ұлы дала өркениетінің мызғымас темірқазығы», деді Қ.Тоқаев.