Суретті түсірген Ерлан ОМАР, «EQ»
Шаруаның шығыны шаш-етектен. Алқаптағы дәннің сабағын сансыз тұяқ бір таптап өтсе, түмен-түмен киікті қайтармақ болып әуреге түскен шаруаның өзі көлігімен екі таптап кетіп жатыр.
– Таяуда ғана Қарамеңді ауылының маңында бірнеше күн бойы екі көлікке мінгескен алты инспектор жүрді. Қазір олар Буревестник жаққа кетті. Жануарларды қорғау инспекторлары біздің алқаптармен шектесіп жатқан ойда 30 мың бастан асатын киік жүргенін айтты. Шынын айтсақ, күндіз күлкіден, түнде ұйқыдан айырылдық. Алқапты күн сайын төрт көлікпен күзетіп жүрміз. Таңғы сағат төрт жарым-бестен бастаймыз да кешкі сағат он бір-он екіге дейін, қараңғы түскенше жүреміз. Таңертең қайта оралғанша қаптаған киік егіннің шетін жеп қойып жатыр. Ал алқапты басып-жаншып, жайпап кеткенін есептеп, оның шығынын шығара алмаймыз ғой. Әр алқапта мыңдап өріп жүр, – дейді шаруалардың бірі.
Осылайша, диқандар бетімен жайылған киіктің үйірлі шегірткедей қаптап келіп, егінге орасан зиян тигізіп жатқанын айтады. Қазірше оны бақылап жатқан ешкім жоқ. Жануарларды қорғайтын инспекторлардың жұмысы киікті сұр мергеннің сұқ мылтығынан қорғаумен және санақ алумен ғана шектеледі. Олар шаруалардың мәселесіне бас қатырмайды.
Киік таптап кетіп жатқан егін алқаптарының бәрі Науырзым мемлекеттік табиғи қорығының маңайында.
– Біз қорық аумағында жүрген киіктерді ғана бақылаймыз. Қорықтан тыс жерде жүрген киіктерге жауап бермейміз. Қазір киіктің нақты санын айта алмаймын. Өйткені ерте көктемде жүргізілген санақ нәтижелері қайта өңделіп жатыр, – дейді «Науырзым» қорығы директорының орынбасары Еламан Күмісбеков.
Қостанай облысы
