Қазақ мәдениеті күндерінің салтанатты жабылуына Мәдениет және спорт министрі Асхат Оралов қатысты. Ол жиналған көрерменге бауырлас қазақ халқының ыстық сәлемін жеткізіп, Қазақстанның мәдениет күндерін ұйымдастыруға көмектескені үшін өзбек тарапына алғысын білдірді.
«Бірнеше күн ішінде Өзбекстанның ірі қалаларында қазақстандық фильмдердің көрсетілімдері, әртістеріміздің гала-концерттері және басқа да іс-шаралар өтті. Қазақстанның мәдениет күндерін «Абай» операсының көрсетілімі аяқтайды. Абай Құнанбайұлы – қазақ халқының ғана емес, бүкіл әлем үшін даңқты тұлға. Абай әрқашан адамзат баласын сүюге шақырған. Осы қағидаларға сүйене отырып, біз өзбек әріптестерімізбен қарым-қатынасты нығайту бағытында жұмыс істейміз деп уағдаластық. Өзбекстан Республикасының мәдениет және туризм министрлігіне рухани қолдау көрсеткені және көмектескені үшін ерекше рахмет айтамын», деді министр.
Ведомство басшысы Өзбекстанға жұмыс сапары аясында Төле би кесенесі мен әлемдегі ең көне Құран қолжазбасы сақталған Хаст-Имам мешітін аралады. Сонымен қатар өзбек әріптесі Озодбек Назарбековпен екіжақты кездесу өткізіп, екі елдің мәдениет және туризм саласындағы ынтымақтастықты талқылады.
Өзбекстандағы Қазақ мәдениеті күндерінің төрткүндік бағдарламасына сай 20 маусымда Ташкенттегі «Түркістан» өнер сарайында Роза Бағланова атындағы «Қазақконцерт» МКҰ әртістерінің гала-концерті өтті. Сахнаға Қазақстанның еңбек сіңірген қайраткерлері Салтанат Ахметова мен Әлішер Кәрімов, «Дарын» мемлекеттік жастар сыйлығының лауреаты Рухия Байдүкенова, республикалық және халықаралық байқаулардың лауреаттары Дінисламбек Жайлаубай, Салтанат Меңдіғалиева, Дидар Әбдіхалық, GULDER ансамблі мен TURAN этно-фольклорлық ансамблінің әртістері шықты. Мұндай гала-концерттер Өзбекстанның басқа қалаларында да өтті.
Қазақ өнерпаздары 22 маусымда Самарқанд облыстық музыкалық-драма театрында, 23 маусымда Бұхарадағы жастар орталығының концерт залында өнер көрсетті. Ал Ташкент қаласындағы Әлішер Науаи атындағы кинотеатрда 20-23 маусым аралығы қазақ киносына арналды. Бағдарламаға «Мұқағали» (режиссері Болат Қалымбетов), «Дос-Мұқасан» (режиссері Айдын Сахаман), «Паралимпиадашы» (режиссері Алдияр Байрақымов), «Стартта» (режиссері Ернар Нұрғалиев), «1941 жылдың жазы» (режиссері Бекболат Шекеров) кинокартиналары, «Сұлтан Бейбарыс» лентасы (режиссері Болат Мансұров) және «Кенже қыз», «Бесік жыры», «Әмен-аға ағашы» анимациялық фильмдері енді.
Айта кетейік, қазақ өнерінің өзбек төріндегі бұл сапары алдағы уақытта да жалғаспақ. Биыл Өзбекстан Республикасында М.Өскінбаев атындағы Маңғыстау облыстық филармониясының гастрольдік сапары жоспарланып отыр.
