Білім • 29 Маусым, 2023

Мемлекеттік басқару академиясының түлектеріне диплом табысталды

360 рет
көрсетілді
3 мин
оқу үшін

Бүгін, 29 маусымда ҚР Президентінің жанындағы Мемлекеттік басқару академиясының түлектеріне салтанатты түрде диплом табыстау рәсімі өтті. 2022-2023 оқу жылында Академияны 8 докторант және магистратура бағдарламаларының 162 түлегі дипломын сәтті қорғады, деп хабарлайды Egemen.kz.

Мемлекеттік басқару академиясының түлектеріне диплом табысталды

Іс-шара барысында дәстүр бойынша Академия ректоры Ерлан Әбіл түлектерді құттықтап, жылы лебізін білдірді.

«Өзгермелі заман талаптарына сәйкес білімді, кәсіби құзыреттілігі мол, бәсекеге қабілетті мамандарды даярлау мақсатында Академия өз тарапынан ауқымды жұмыстар жүргізіп жатыр. Академия қабырғасында алған білімдеріңізбен еліміздің өркендеп-дамуына елеулі үлес қосып, мемлекеттік басқару саласының білікті маманы болатындарыңызға, Академия түлегі мәртебесін биік ұстайтындарыңызға сеніміміз мол», деді ректор.

Айта кетсек, биыл Басқару институтының 4 магистранты Академия мен Финляндияның Сейняйоки қолданбалы ғылымдар университеті арасындағы келісім бойынша қосдипломды бағдарлама аясында білім алып келді.

Салтанатты іс-шарада Мемлекеттік саясаттың ұлттық мектебін тәмамдаған Біржан Әлімжанов Академияға алғысын білдірді. 

«Мемлекеттік басқару академиясының табалдырығын аттаған сәтте, барлығымызда ортақ мақсат пайда болды, ол – білім мен біліктілігімізді ұштау, оқуды абыроймен аяқтау. Көзді ашып жұмғанша бізге берілген уақыт аяқталды, мақсатымыздың іске асуына бір ғана қадам қалды. Әрбір түлекке алған білімдерін халық игілігіне, пайдасына жаратуына тілектеспін. Қазақтың қамын жеу, мұң-мұқтажын түгендеу, бауырға басқан әрбір баласының лайықты өмір сүруіне жағдай жасау біздің – қатардағы мемлекеттік қызметшілердің, жаңа буын басшыларының асыл мұраты. Академияда оқумен қатар, күнделікті күйбең, арпалыс тіршілікте бағасына жете бермейтін риясыз достық, шынайылық, адалдық, қарапайымдылық секілді адами құндылықтардың мәнімен қайта қауыштық. Теңеумен айтсам, біз үшін Академия - мемлекеттік қызмет деп аталатын алпауыт мұхитта кездескен тыныштық аралы», деді түлек.

.

Салтанатты іс-шараға ҚР Президенті Әкімшілігі Мемлекеттік басқару бөлімінің меңгерушісі Альтаир Ахметов, ҚР Президенті Әкімшілігінің Сыртқы саясат және халықаралық байланыстар бөлімінің меңгерушісі Дәулетбек Құсайынов, ҚР Президенті Әкімшілігінің Мемлекеттік қызмет және кадр саясаты бөлімінің меңгерушісі Руслан Тұрғаналы, Финляндияның Қазақстан Республикасындағы Елшісі Сойли Мякеляйнен-Буханист, ҚР Мемлекеттік қызмет істері агенттігінің төрағасы Дархан Жазықбаев, Астана хабының Мемлекеттік қызмет саласындағы басқарушы комитетінің төрағасы Әлихан Байменов, ҚР Үкіметі Аппараты Басшысының орынбасары Асқар Биахметов, ҚР Парламенті Мәжілісі төрағасының орынбасары Дания Еспаева, ҚР Ғылым және жоғары білім министрі Саясат Нұрбек, ҚР Парламенті Мәжілісінің экс-депутаты Ерсұлтан Бектұрғанов қатысты.