Жаңа білім беру бағдарламасын бакалавриат деңгейінде 2019 жылы екі жоғары оқу орны – Əбілқас Сағынов атындағы Қарағанды техникалық университеті жəне Қарағанды медицина университеті қолданысқа енгізген болатын. Осы мамандыққа оқуға түскен
80 студент денсаулық сақтауда қолданылатын ақпараттық технологияларды, бағдарламалау құралдарын, мəліметтер базасын, биомедициналық ақпаратты өңдеу жəне талдау əдістерін үйренеді.
«IT-медицина» білім беру бағдарламасы бойынша диплом алған түлектердің қатарында Тамырлан Алдоңғаров та бар. Жас маман оқуын озық тәмамдап отыр. Қолында қызыл диплом. Әрі қарай магистратураға түсуге ниетті.
– Əуел баста мен университетке түсуге дайындалып жатқанда бағдарламашы болғым келген. Ұлттық бірыңғай тест тапсырдым жəне техникалық университетте менің салама сəйкес келетін бірнеше бағдарлама бар екенін білдім. Мені ІТ-медицина қызықтырды. Бұл – бейінді жəне қиын мамандық. Ағам облыстық онкологиялық орталықта хирург-онколог болып жұмыс істейді. Өзім жай бағдарламашы емес, өмірімді медицинамен байланыстырғым келетінін түсініп, қадам жасадым. Оның үстіне елімізде осындай мамандардың жетіспеушілігі де сезіледі. Оқуды əрі қарай жалғастырғым келеді, дамимын, міндетті түрде магистратураға түсемін, – дейді президенттік стипендиат Тамырлан Алдоңғаров.
Əбілқас Сағынов атындағы Қарағанды техникалық университетінің ақпараттық-есептеу жүйелері кафедрасының меңгерушісі Алексей Калинин ІТ-дəрігер жарқын болашақтың кəсібі екенін, медицина саласында заманауи ақпараттық технологиялардың көбейіп жатқанын атап өтті.
– Отандық медицинада көптеген заманауи ақпараттық технологиялар күн сайын енгізілу үстінде десек, қателеспейміз. Бүгінгі дəрігер зерттеу жүргізгеннен кейін деректерді өңдеу керек. Бізде медициналық оқытумен техникалық оқытуды толықтыру жүріп жатыр. Оқу төрт жылға созылады. Осы арқылы мамандарымыз бірден екі салада құзыретті болады, – дейді Алексей Калинин.
Жаңа бағдарлама бойынша оқитын студенттер емханалар мен дəріханаларда тəжірибеден өтеді. Қазіргі уақытта медициналық деректерді өңдеумен айналысатын ІТ-мамандарына үлкен қажеттілік бар. Қазірдің өзінде ІТ-дəрігерлер республикалық медициналық зерттеу орталықтарында үлкен сұранысқа ие. Оқуды жалғастыруға да болады. Мысалы, Қарағанды медицина университетінің «Биомедицина» білім беру бағдарламасына магистратураға құжат тапсыру мүмкіндігі де қарастырылған.
– Биомедицина – бұл барлық жаратылыстану-ғылыми мамандықтардың өкілдерін шақыратын кең бағыт деп айта аламын. Бұған биоинформатика да кіреді. Геном құрылымын математикалық əдістермен зерттеу жəне молекулалық-генетикалық механизмдерді, патологиялық үдерістердің тетіктерін зерттеу нысаны етуге болады. ІТ-дəрігерлер – келешектің əмбебап мамандары, – дейді Қарағанды медицина университетінің стратегиялық даму жəне халықаралық ынтымақтастық жөніндегі проректоры Виктор Риклефс.
«ІТ-медицина» бағдарламасы бойынша оқығандар өзі қабылданған университеттің дипломын алады. Бұл – ақпараттық-коммуникациялық технологиялар бакалавры немесе денсаулық сақтау бакалавры. Əр дипломға екі университеттің пəндері мен бағалары бар екі транскрипт бар.
Биыл жаңа білім беру бағдарламасына талапкерлерді қабылдау жалғасатынын да қаперге сала кетейік.
Қасымхан ҒАЛЫМ,
«Egemen Qazaqstan»
