Жарысты «Жүрек орталығы» қоры ұйымдастырды, ол дәрігерлерге ғылым, білім және ағартушылықты біріктіре отырып, жүрек ауруымен күресуге көмектеседі. Ағартушылық қызмет аясындағы ірі іс-шаралардың бірі – «Сен – менің жүрегімнің чемпионысың». Іс-шараны өткізуге Астана әкімдігі қолдау көрсетті.
Нәтижеге қарамастан әрбір қатысушы – жүрек чемпионы, ол кардио қызметін дамытуға зор үлес қосады және Қазақстандағы трансплантология туралы маңызды диалогқа жол ашуға көмектеседі.
«Біз өткен жылы 500 қатысушыдан бастап, биыл 1300-ге жеткенімізге қуаныштымыз. Ұйымдастырушылық жұмыстардың негізгі бөлігін «Жүрек орталығы» қорының 5 адамнан тұратын шағын тобы орындайтыны үлкен мақтаныш. Сондай-ақ қашықтыққа жүгіретін адамдарды мақтан тұтамыз, өйткені олардың барлығы нағыз қаһармандар.
Мәселен олардың қатарында диализден өткен және бүйрек трансплантациясын күту парағында жүрген жігіттер бар. Бұл нағыз батылдық пен өмірге деген сүйіспеншіліктің үлгісі.
Біз үшін жүгіру – бұл өмірдің берген сыйы. Өйткені жүгіреміз, денеміз бен рухымызды нығайтамыз әрі ең қиын диагнозы бар адамдарға қандай жағдай болмасын толық өмір сүруге мүмкіндік беретін медицинаны құрметтейміз. Бұл жарыс Қазақстанда донорлықты дамыту туралы өте маңызды және күрделі, бірақ этикалық және ыңғайлы диалог алаңына айналды. Бұл диалог осы алаңда сәтті дамып келе жатқанына сенімдіміз», деді Қордың коммуникациялар жөніндегі менеджері Екатерина Мостовая.
Есен – 10 шақырым қашықтықтағы жарысқа қатысушы – күту тізіміндегі пациенттердің бірі. Ол ҚР Қорғаныс министрлігінің элиталық арнайы жасақ бөлімшесінде әскери қызметші болған және қоян-қолтық ұрыстан спорт шебері. Бірақ карьерасын тоқтатуына тура келді: «гломерулонефрит» диагнозына байланысты ол трансплантация жасауы керек. Қазір гемодиализ алып, емделіп жүр.
«Диагноз үкім емес. Біз өзімізді формада ұстауымыз керек, біз сияқты адамдардың қалай өмір сүретінін көрсетуіміз керек. Мен күту тізіміндегі қалған пациенттерді спортпен шұғылдануға, жүгіруге, өмірді сүюге және ауруға берілмеуге шақырғым келеді», дейді Есен.
Жарыстан жиналған барлық қаражат донорлық саладағы мамандарға арналған білім беру жобаларын, сол сияқты қор мен транспланттауды үйлестіру жөніндегі республикалық орталық арасындағы меморандум аясындағы жобаларды іске асыруға бағытталатын болады.
