Әлем чемпионатының ашылу салтанаты «Baku Crystal Hall» әмбебап кешенінде өтті. Оған спортшылар мен жанкүйерлерден бөлек жергілікті билік басындағы азаматтар мен осы спорт түрінің мамандары қатысты. Алғашқы болып сөз алған Халықаралық нысана көздеу федерациясының (ISSF) президенті Лучано Росси: «Кейінгі жылдары Әзербайжанда спорттың сан алуан түрі бойынша көптеген дүбірлі додалар аса жоғары деңгейде ұйымдастырылып жүр. Мергендер жарысының дәрежесі де биік болатынына еш күмәнім жоқ. Алдағы екі аптада біз нысана көздеудің барлық бағдарламасы бойынша үздіктерді анықтаймыз. Париж Олимпиадасына дейін бір ғана жыл қалды. Сол себепті осы әлем чемпионатында жолдамалардың басым бөлігі сарапқа салынады», деп мәлімдеді.
Каспий теңізінің жағалауында еліміздің туы астында 26 спортшы өнер көрсетеді. Олар: Елдар Иманқұлов, Валерий Рақымжан, Максим Мазепа, Никита Чирюкин, Руслан Юнусметов, Артемий Кабаков, Алексей Лотарев, Сәуле Әлімбек, Ольга Аксенова, Ирина Юнусметова, Валерия Попелова (тапанша); Ислам Сәтбаев, Юрий Юрков, Константин Малиновский, Илья Федин, Арина Алтухова, Елизавета Безрукова, Александра Ле, Анастасия Григорьева (мылтық); Бақтияр Ыбыраев, Андрей Худяков, Асадбек Назиркулиев, Илья Зотеев, Фатима Ирназарова, Зухра Ирназарова және Александра Сәдуақасова (жылжымалы нысана).
Нысана көздеуден еліміздің ұлттық құрамасы Бакудегі әлем чемпионатына тыңғылықты даярланды. Жыл басынан бері олар Индонезия мен Әзербайжанда ұйымдастырылған Әлем кубогінің кезеңдік сайыстарына қатысты. Қазақстан Республикасының спартакиадасында бақ сынап, Қытайдың Чэнду қаласында алауы тұтанған жазғы Дүниежүзілік универсиадада өнер көрсетті. Соңғы оқу-жаттығу жиынын құралайды көзге атқан мергендер Әзербайжанның Габала қаласында өткізіп, осы жақта шеберліктерін әбден шыңдады. Енді біз жерлестеріміз Бакуде барынша жақсы өнер көрсетеді деп үміттенеміз.
