Фото: pavlodarnews.kz
Pavlodarnews.kz ұсынған мәліметіне сүйенсек, Родион Ивановтың таяуда TikTok желісінде шыққан видеосы 2 миллионнан аса қаралым жинаған. Желі қолданушылары ұлты орыс жігітінің қазақша таза сөйлегеніне риза болып, жылы лебіздерін жарыса жазып жатты.
Ал Родионның айтуынша, желіде тараған видеоны осыдан екі жыл бұрын әпкесі түсіріп алған.
«Бұл – мұрағаттық видео, оның бүкіл жерде тарап кететінін күтпедім», – дейді ол.
Родион орыс тілді балабақша мен мектепке барған, ал қазақ тіліне оқушы кезінде қызыға бастаған.
«Екінші сыныпта қазақ тілін оқып жүргенімде «Қазақстан» телеарнасында көрсетілген кәріс сериалдарын қарап, сол арқылы үйреніп алдым. Сериалды орысша субтитр арқылы қараған едім», дейді Родион.
Отбасында бес адамның ішінен тек Родион ғана қазақ тілін еркін меңгерген екен.
«Мен қазақша ойлай бастадым. Кейде ойлаған нәрсені айтпай қоямын, себебі тыңдаушы адам мені түсінбей қалуы мүмкін екенін білемін. Сондықтан ойымды орысшаға аударуға тура келеді», дейді Родион.
Оның ойынша, қазақ тілін үйрену үшін ең бастысы «қ», «ғ» сынды төл дыбыстарды жаттап алу керек.
