Сондай түлектің бірі – Асқар Әлмұхаметов Атырау қаласындағы Назарбаев зияткерлік мектебін бітірген. Оған әлемнің төрт жоғары оқу орнынан оқуға ұсыныс түскен. Қазақ ұланына шақырту жібергендердің қатарында UC Berkeley, Columbia, University of Toronto, Georgia Tech және KAIST университеттері бар.
– Мен компьютерлік ғылым бағытын таңдадым. Қазір экономиканың барлық саласын бұл бағытсыз елестету мүмкін емес. Енді осы салада жоғары білім алуды көздедім. Сол себепті әлемдегі үздік оқу орнының бірі UC Berkeley университетіне оқуға баруға шешім қабылдадым. Өйткені АҚШ-тағы Калифорния штатының Беркли қаласында орналасқан бұл университет компьютер және IT технологиялар, экономика, физика салалары бойынша әлемге әйгілі оқу орнының көш басында тұр, – дейді Асқар.
Ал Полина Вардашко Канаданың Оттава қаласындағы Carleton University-нің студенті атанғалы отыр. Бұл – оның көп жылғы арманы.
– Жоғары білім алатын оқу орнын таңдауда жаңылмау қажет. Өйткені мықты маман болу үшін бәсекеге қабілетті ұстаздары, ғылыми-зертханалық орталығы бар уинверситеттерден дәріс алудың маңызы зор. Осы тұрғыдан айтқанда, Канададағы жоғары білім беру саласына қызығатын едім. Енді жақында осы елдегі танымал университеттің биохимия және биотехнология факультетінде білім алуды бастаймын, – деп қуанышын бөлісті Полина.
Атырау облысы
