Облыс әкімдігінің қолдауымен облыстық мәдениет және туризм басқармасы ұйымдастырған фестиваль аясында 17 аудан, қала әр аптада Түркістан қаласында мәдениет күндерін өткізді. Жұма-сенбі күндері суретшілер мен қолөнер шеберлерінің және аудан, қаланың жетістіктері туралы көрмелер ұйымдастырылып, ұлттық салт-дәстүр мен әдет-ғұрыптар ұлықталды. Сонымен қатар ұлттық спорт түрлерінен сайыстар өткізіліп, өнер жұлдыздарының қатысуымен мерекелік гала-концерт көпшілік назарына ұсынылды. Жастар арасында ұлттық салт-дәстүр мен әдет-ғұрпымызды дәріптеу, келешек ұрпақты саламатты өмір салтына бейімдеу және Түркістанның туристік әлеуетін дамыту мақсатындағы фестиваль жеңімпаздары Конституция күніне арналған «Ата Заңым – айбыным!» атты іс-шарада марапатталды. Салтанатты рәсімде облыс әкімі Дархан Сатыбалды өңірдің рухани-мәдени саласында жетістіктер көп екенін атап өтті. «Осы бағыттағы жұмыстарды жүргізу, өңір мәдениетін дамыту, өнер майталмандарынан құралған шығармашылық ұжымдарды қалыптастыру, облыстық мәдениет және туризм басқармасының «Конгресс Холл» көпсалалы кешеніне түрлі бағыттағы өнер ұжымдарын ашу үшін 100-ден астам штат беріп отырмыз», деді облыс әкімі.
Сондай-ақ облыс әкімі үздік деп танылған аудан-қалалардың көркемөнерпаздар ұжымын марапаттады. Қазылар алқасының шешімімен бас жүлде иегері – Отырар ауданына «Газель» автокөлігі, жүлделі І орын иегері –Шардара ауданына жеңіл автокөлік табыс етілді. Ал ІІ орынды иеленген Мақтаарал ауданы мен Келес ауданы дыбыс жазу студиясы, жүлделі ІІІ орын алған Түркістан қаласы, Сайрам ауданы мен Сарыағаш ауданына музыкалық аппаратура сыйға берілді. Облыстық өнер фестивалінің «Әнім сенсің туған жер» арнайы жүлдесіне Жетісай ауданы, «Өнерлі өлке» арнайы жүлдесіне Созақ ауданы, «Мәдениетім – мерейім» арнайы жүлдесіне Төлеби ауданы, «Салт дәстүрім – қазынам» арнайы жүлдесіне Бәйдібек ауданы лайық деп танылды. Арнайы жүлде иелеріне 500 мың теңге сыйақы берілді.
Бас жүлде иегері Отырар ауданы фестиваль аясында Қазақстан Суретшілер одағының мүшесі Әділхан Мәліктің «Ұлы дала барысы» атты Сұлтан Бейбарыстың 800 жылдығына арналған тақырыптық кескіндеме сурет көрмесін көпшілік назарына ұсынды. Ол Отырар халық театрының «Бейбарыс» қойылымына ұласып, Рахымжан Отарбаевтың туындысы режиссер Ғазиз Арынов пен суретші Әділхан Мәліктің жетекшілігімен сахналанды. Сондай-ақ «Омартасы рухтың – Отырарым» атты ақындар айтысын да көпшілік жоғары бағалады. Ұлттық спорт ойындарынан сайыс, «Ұлы дала дәстүрі» атты салт-дәстүр, әдет-ғұрып көріністері, қолөнер, сурет көрмесі сынды мәдени іс-шаралар облыс орталығына келген қонақтар мен қала тұрғындарын ерекше көңіл күйге бөлеп, отырарлық өнерпаздар көпшіліктің қошеметіне бөленген болатын.
ТҮРКІСТАН
