![Конституцияға арналды](/media/2023/08/29/article_51796.jpg)
«Біз, бүгін мызғымас бірлік пен заң үстемдігінің арқасында елімізді дамытып, қасиетті қаламызды түлете білдік. Былтыр еліміздің Ата Заңына өзгерістер енгізу жөнінде жалпыхалықтық референдум өтті. Аса маңызды шешім қабылданып, 30-дан астам заң баптарына өзгерту мен толықтыру енгізілді. Нәтижесінде, халықтың тікелей қатысуымен маңызды сайлаулар өтті. Жаңа басқару жүйесіне сәйкес Парламенттің ықпалы арта түсті. Конституцияға жер мен жер астындағы байлық халыққа тиесілі екені анық жазылды. Осы арқылы Жаңа Қазақстанға тың бетбұрыс басталды. Өздеріңізге мәлім, осыдан 5 жыл бұрын облысымыз құрылып, Түркістан қаласы облыс орталығы ретінде қалыптасты. Айтарлықтай жетістікке жетті. Түркі жұртының рухани астанасы Түркістанымызда күн санап түрлі нысан бой көтеріп, республикалық және халықаралық деңгейде іс-шаралар өтетін орталыққа айналды», деді облыс әкімі Дархан Сатыбалды.
Сондай-ақ өңір басшысы биыл Түркістан қаласында Түркі елдерінің туризм министрлерінің басқосуы жоспарланғанын атап өтті. Қазіргі таңда шет елдерден және еліміздің аймақтарынан келетін туристердің саны өскеніне назар аударды.
«Мемлекет басшысы Қасым-Жомарт Тоқаевтың тікелей қолдауымен өңірде ауқымды жобалар қолға алынды. Осы маңызды істерді атқаруға үлес қосып жүрген баршаңызға алғысымды білдіремін. Бұның бәрі – елдің бірлігі мен ерен еңбегінің, тұрақтылыққа тұғыр болған Ата Заңымыздың арқасында қол жеткізген табыстар. Тәуелсіздігіміз тұғырлы, Конституциямыз ғұмырлы, елдігіміз мәңгі болсын! Ата Заңды ардақ тұтқан өнегелі еліміз өркендей берсін», деді Д.Сатыбалды.
Облыс әкімі биыл 7 айда өңірге 500 мыңға жуық турист пен зиярат етуші келгенін атап өтті. Туристік әлеуетті одан әрі дамыту мақсатында қаладағы халықаралық әуежайдың рейстер санын ұлғайту бойынша жұмыс тұрақты түрде жүргізіліп келеді. Түркістан қаласындағы халықаралық әуежайдан былтыр Ыстанбұл және Кувейт бағытына тікелей рейстер ашылды. Қазан айында Біріккен Араб Әмірлігінің астанасы Абу-Даби қаласына тікелей рейстің ашылуы жоспарланып отыр. «Сонымен қатар Мәскеу, Анталья, Тбилиси, Самарқанд қалаларына рейстер ашуға Үкіметке ұсыныс енгіздік. Ішкі бағытта Астана мен Алматыға рейстердің саны көбейтілді. Бұдан бөлек, Президент тапсырмасымен «Жеті жарғы» заңдар жинағы әзірленген Түркістанға қазіргі таңда ерекше мәртебе беру туралы заң жобасы талқыланып жатыр», деді облыс әкімі.
Салтанатты іс-шарада облыс басшысы білім, денсаулық, төтенше жағдай, өрт сөндіру, құқық қорғау саласында еңбек сіңірген, облыстың әлеуметтік-экономикалық дамуына елеулі үлес қосқан мамандарды марапаттап, облыс әкімінің грамотасы мен алғысхатын тапсырды. Сонымен қатар өңір басшысы Түркістан облысының 5 жылдығы аясында облыс әкімдігінің қолдауымен сәуір-тамыз айлары аралығында аудан, қалалық өнер шеберлерінің қатысуымен өткен облыстық «Өнерлі өлке» фестивалінің жеңімпаздарын марапаттады.
Салтанатты іс-шарада мемлекеттік қызметке жаңадан қабылданған мамандар ант берді. Мерекелік жиынға облыс әкімінің орынбасарлары, мәслихат депутаттары, облыстық басқарма басшылары, құқық қорғау органдарының басшылары, ардагерлер алқасы мен зиялы қауым өкілдері, ҮЕҰ мүшелері, студент жастар, БАҚ өкілдерінен құралған 1000-ға жуық азамат қатысты. Бұл күні облыстың өнер ұжымдары мен әншілері концерттік бағдарлама ұсынып, патриоттық әндерді шырқады. «Қазақстан дауысы балалар» жобасының финалисі Байзақ Еңліктен бөлек қазақ эстрадасының майталмандары «Музарт» тобы өнер көрсетіп, көрерменге мерекелік көңіл-күй сыйлады.