Облыстық қоғамдық даму басқармасы басшысының орынбасары Абылайхан Кәкеновтың айтуынша, ел көлемінде осымен оныншы, ал облыста тоғызыншы рет өтіп жатқан байқауға бүгінге дейін өңірден өз ауыл-аймағында көпке үлгі-өнеге болып отырған 800-ден аса отбасы қатысқан. Биылғы байқаудың бір ерекшелігі – жас отбасылар жағы басым. Олардың ішінде қазақтардан бөлек, поляк, украин, әзербайжан, шешен ұлтының өкілдері де бар.
Салтанатты жиынға қатысушыларды әуелі облыс әкімінің орынбасары құттықтады.
– Отбасы – қоғамды жаңғырту мен біріктіруге шақыратын, кез келген ортада абыройлы болуға тәрбиелейтін әлеуметтік-мәдени институт. Халқымыз үшін қастерлі, қасиетті ұғым. Қазақтың «Отан отбасынан басталады» деген дана сөзі бекер айтылмаған. Себебі ұрпақтар сабақтастығы, үлкенге құрмет, кішіге қамқорлық сынды асыл қасиеттер отбасында қалыптасады. Біз үшін талай жылдан бері өтіп келе жатқан «Мерейлі отбасы» байқауының маңызы зор. Осы салтанатта облысымыздың түкпір-түкпірінен келген көпшілікке үлгі болатын отбасыларға алғыс айтып, құрмет көрсетпекпіз. Бүгінде елімізде көпбалалы отбасыларға, жас отбасыларға, сондай-ақ толық емес отбасыларға көптеген қамқорлық, қолдау көрсетіледі. Мысалы, Қостанай облысында «Қостанай жастары» тұрғын үй бағдарламасы іске асырылып жатыр. Бұл бағдарламаға былтыр 700 млн теңге бөлініп, 200-ге жуық жас отбасы жағдайларын жақсартып алды. Биыл аталған бағдарламаға 2 млрд теңгеден асатын қаржы бөлініп, пәтер жалдап жүрген жас отбасылардың баспаналы болуына жол ашылып жатыр, – деді Р.Мұхаметқалиев.
Үміткерлердің арасында қарапайым еңбеккерлер әулеті, спортшылар, мұғалімдер, дәрігерлер отбасы бар. Мысалы, Арқалық қаласынан келген Ерәділов отбасын алсақ, отағасы қалалық балалар және жасөспірімдер спорт мектебінің аға бапкері Азамат – талай баланы ұлттық күреске баулыған тәлімгер, Қазақстанның спорт шебері, «Құрметті спорт қызметкері» төсбелгісінің иегері, қазақ күресінен Ұлттық спорттық төрешісі, бірнеше рет «Үздік бапкер» атанған абзал азамат. Жұбайы Гүлден Қоқашова Арқалық политехникалық колледжінде ұстаздық етеді. 2018 жылы Жаңашыл педагог атанған, Арқалық әкімінің құрмет грамотасымен марапатталған. Осы үйдің тұңғышы Айару Кейкі батыр атындағы орта мектептің 9-сыныбында оқиды. Информатика, ағылшын тілі пәндері бойынша өткен білім байқауларында, сондай-ақ зияткерлік олимпиадаларда жүлделі орындардан көрініп келеді. Ортаншы ұл Нұрасыл аталған мектептің 7-сынып оқушысы, қазақ күресінен өтіп тұратын аудандық, қалалық жарыстарда жүлделі орындарды жеңіп алып жүр.
Байқауға түскен 20 үміткердің ішінен Алтынсарин ауданына қарасты Шербаков ауылында тұратын Ермағамбетов отбасының бағы асып, бас жүлде бұйырып, биылғы мерейлі отбасы атанды. Өсіп-өнген әулеттің ақсақалы Әлтай қария мен Зылиха әжей тәрбиелеп өсірген 10 баладан бүгінде 20 шақты немере-шөбере сүйіп отыр. Әлтай Ермағамбетов Наурызым ауданында 40 жыл механизатор болып жұмыс істеген. Зейнеттегі қария үйде бір күн қол қусырып қарап отыруды білмейді. Қоғамдық жұмыстарға белсене араласып, үнемі шапқылап жүреді. Аудандық ардагерлер кеңесі мен жергілікті әкімдік жанындағы қоғамдық кеңестің мүшесі. Балаларының бәрі қазір бөлек-бөлек үй болып, әрқайсысы өз орнын тапқан. Ортаншы қызы Гүлшат Кенешованың мамандығы тәрбиеші болғанымен, мектепте вахтер болып жұмыс істейді. Жолдасы Төлеухан екеуі төрт бала тәрбиелеп отыр. Төлеухан – қазір күзгі жиын-терін жұмыстарында. Одан босаған соң қыстай үй шаруасымен айналысып, қолдағы малына қарайды. Гүлшат бос уақытында тапсырыспен көрпе-жастық, дорба, қыз жасауына қажет бұйымдар тігеді. Оның сыртында неше түрлі шағын кәдесыйлар жасап сатып, табыс қылады. Ісмер осы өнегенің бәрі анасынан жұққанын айтады.
– Анашым мен ес білгелі үш жерде жұмыс істеп жүріп бізді бақты, қақты, жеткізді. Қолы қалт еткенде тігін тігіп, жүн иіріп, шұлық тоқып отыратын. Соның бәрін көріп өстік. Анам қазір үш сиыр, мен бес сиыр сауамын. Оның құрты, ірімшігі, қаймақ-майы қысы-жазы үзілмейді, –дейді ісмер.
Әлтай қарияның кенжесі Жансая Ермағамбетова – спорт шебері. 2022 жылы ұлттық спорт түрі жекпе-жектен Қазақстан чемпионы, Қазақстан кубогының иегері. Панкратионнан Қазақстан біріншілігінің күміс және қола жүлдегері. 2021 жылы Абу-Дабиде өткен халықаралық жарыста қола медаль ұтып алған. Қазір өңірдің таңдаулы кәсіби спортшыларының санатында.
Алдағы уақытта Ермағамбетов отбасы облыс атынан Астанада өтетін «Мерейлі отбасы» ұлттық байқауына қатысады.
Қостанай облысы
