Бокс • 01 Қыркүйек, 2023

Финляндия IBA-мен қоштасты

129 рет
көрсетілді
1 мин
оқу үшін

Халықаралық бокс қауымдастығы (IBA) қатарынан Финляндияның бокс федерациясы шығатынын мәлімдеді.

Финляндия IBA-мен қоштасты

Аталған елдің бокс федерациясының атқарушы директоры Марко Лайненің ай­туын­ша, Финляндия жаңадан құрылған World Boxing ұйымына қосылады.

– Халықаралық бокс қауымдастығы 2019 жылдан бері Олимпиялық ойындарға іріктеу турнирін өткізу құқығынан айырылған. Ал биылдан бастап Халықаралық олимпиялық комитет IBA-ны мүлдем мойындамайтынын мәлімдеді. Олимпиадаға боксшыларды іріктеумен енді ХОК-тың өзі айналысады. Ал біз Олимпиадаға қатысқымыз келеді. Сондықтан World Boxing ұйымы арқылы төртжылдықтың басты жарысына қатысуды мақсат етіп отырмыз, – деді ол.

Биыл World Boxing ұйымы құрылған. Әзірше оны ХОК-тың өзі мойындаған жоқ. ХОК World Boxing ұйымына қатыс­ты ше­шімді Халықаралық бокс қауым­дас­ты­ғының ісін тексергеннен кейін қабылдайды.

Қазір жаңадан құрылған бокс ұйымына АҚШ, Аустралия, Англия, Ұлыбритания, Нидерланд, Жаңа Зеландия, Канада, Бра­зилия, Аргентина, Германия, Гондурас және Швеция елдерінің бокс федерациялары мүше. Ал Қазақстан бокс федерация­сы Халықаралық бокс қауымдастығының құрамында.