Сержант мұндай тосын жайтқа Астана қаласының оңтүстік-шығыс шағын ауданындағы туыстарына келген кезде тап болған. «Күтпеген жерден жиенім көрші тұрған көпқабатты үйдің балконынан бір қыздың секірмек болып жатқанын айтып айқайлады. Мұны көріп кіреберіске жүгіріп барып, жеделсатымен 14-қабатқа шықтым. 15-қабатқа баспалдақпен көтерілдім. Қызға дыбыссыз жақындап келдім де, шап беріп ұстап, жерге түсіріп алдым», дейді Ерік Ысқақов.
35 жастағы әскери қызметші – төрт баланың әкесі. Түркістан облысы Арыс қаласының оқ-дәрі қоймасындағы жарылыс кезінде тұрғындарды эвакуациялауға қатысқан. Әскер саласында көпті көрген ол бұл жолы да уақытты тиімді пайдаланып, оқыс жағдайда батыл әрекет етіп, адам өмірін сақтап қалды.
Сержант Ысқақов өз әрекетін ерлік деп санамайды, алайда жасөспірімді орны толмас қайғыдан құтқара алғанына қуанғанын жасырмады.
