Мектеп • 06 Қыркүйек, 2023

Жайлы мектептер

326 рет
көрсетілді
3 мин
оқу үшін

Атырау облысында 204 мектепте алғашқы қоңырау соғылып, білім ордаларының 1-сыныбына 12 мыңнан астам оқушы қабылданған. Білім күнінде бірнеше жаңа мектеп ашылды. Олардың екеуі – Binom үлгісіндегі инновациялық мектеп. Оның біріне ғұлама Әл-Фарабидің, екіншісіне мемлекет қайраткері Дінмұхамед Қонаевтың есімі берілген.

Жайлы мектептер

«Заманауи үлгідегі екі мектепте білім алуға ниеттенген оқушылар қатары көбейді. Білім са­пасын көтеру, балаларға то­лық­­қанды жағдай жасау үшін тағы да екі Binom мектебін ашу ту­­ралы шешім қабылданды. Бұл мектепте барлық мүмкіндік бар. Соған сай мектеп те үздіктердің бірі болуы қажет», деді облыс әкімі Серік Шәпкенов.

Мәселен, Д.Қонаев атындағы Binom мектебінде 4 мың оқушы білім алады. Мұнда барлығы 160 сы­нып ашылған. Мәселен, 22 лицей сыныбында 550 бала оқи­ды. Ал 10, 11-сыныптарда жа­­ра­тылыстану-математика ба­ғы­тында оқытылады. Мектеп директоры Ләззат Дүйсенбаеваның ай­туынша, білім ордасының аума­ғы 22 мың шаршы метрді құрайды. Мұнда 94 кабинет, оның ішінде физика, химия, био­логия пәндеріне арналған алты кеңейтілген зертхана мен зерт­ха­налық бөлмесі бар. Білім ордасы сегіз информатика каби­не­ті­мен, екі спортзал, хореография залы, 48 орындық мульти­ме­­диа сыныбы, 50 орындық кино­­зал, 300 орындық акт залы, ойын бөлмелерімен қамтылған. Ал кітапханаға 10 мың кітап қойыл­­ған. Сондай-ақ 75 орын­дық мо­ноблогі бар «Та­ным» шы­ғармашылық техно­ло­гия­лар орталығы, асхана мен меди­циналық пункт оқушы­лардың игілігіне қызмет етеді. Білім ордасында пішіндер мен материалдармен шығармашылық эксперимент жасау үшін 3D-принтер, металл, ағаш ою, мата өңдеу, технология, аспаздық шеберханалар, роботтехника кабинеті бар. Сондай-ақ STEAM білім беру кабинетімен, әр оқушыға арналған жеке локермен қамтылған. Ғимарат ерекше білім беру қажеттілігі бар балалар үшін жеделсатымен, пандустармен жабдықталған.

Өңірде жаңадан ашылған білім ошақтарының бірі – Жаңа­талап ауы­лындағы «Сармат» маман­дан­дырылған мектеп-интернаты. Алғаш рет есігін ашқан білім ордасының 7,8 және 9-сыныбында 150 оқушы оқиды. Оқушыларға 14 мұғалім дәріс береді. Ал келесі жылы оқушылар санын 300-ге жеткізу көзделіп отыр.

«Бұл мектеп-интернатта оқу­­шыларға жалпы орта білім­мен бірге әскери істің қыр-сыры оқы­­­ты­лады. «Сармат» мек­теп-ин­тер­наты – көптен күт­кен жоба­­ның бірі. Ғимарат құ­ры­лы­сы басталғалы бері білім ор­дасы­ның тұжырымдамасы, тәр­биелік
жұмыс бағыты айқын­далды. Мек­теп-интернатқа қа­был­дану үшін оқушылар норматив тапсырып, тестілеуден өтті. Оқушылардың арасынан үздіктері таңдалды. Білім мен тәрбие – ажырамас ұғым. Мұнда оқушыларға сапалы білімге қоса, ұлттық тәрбие беріледі. Осын­да дәріс алатын әр түлек Ота­нына адал қызмет ететін офи­церлер корпусының қатарын толық­тырады», деді Атырау облысы әкімінің орынбасары Жасұлан Бисембиев.

«Сармат» мамандандырылған мектеп-интернатында жараты­­лыс­тану-математика бағытында­ғы физика, биология, химия, гео­графия пәндері тереңдетіліп оқы­тылады. Сондай-ақ әскери бейіндік пәндер, спорт, алғашқы әскери дайындық, би, ән, домбыра сынды үйірмелер ашылған. Мектеп-интернаттың жанында үш қабатты жатақхана салынған. Оқушыларға әскери үлгідегі киім, бес мезгіл тамақ тегін бе­рі­леді. Пәндік сыныптардан бө­лек, әскери дайындық үшін ар­найы жаттығу алаңы, заманауи зерт­­ханалар және кітапханамен қамтылып отыр.

 

Атырау облысы