Жаңа мектептің салынуына осы ауылда кіндік қаны тамған Алдаберген ақсақалдың немересі Дәурен Қанатұлы ұйытқы болды. «Халық игілігі» қайырымдылық қоры 100 балаға арналған екіқабатты жаңа мектептің құрылысын былтыр бастап, биылғы оқу жылында пайдалануға берді. Аумағы 3,5 мың шаршы метрге тең мектеп құрылысына 750 млн теңге жұмсалған. Мұндағы оқу мемлекеттік тілде әрі бір ауысымда жүргізіледі.
Осылайша, атымтай жомарт азамат ауыл тұрғындарын зор қуанышқа кенелтті. Әсіресе жаңа оқу жылында табалдырығынан төріне дейін заманауи дүниелермен жабдықталған жаңа мектепте оқитын оқушылардың кеудесін мақтаныш кернеп жүр. Олар енді жақсы оқуға, үлгілі болуға талпынары анық. Биыл Қосқұдықтағы орта мектепке 86 оқушы барды. 5 бүлдіршін 1-сыныпқа қабылданды. «Жалпы, Қосқұдықтың даму әлеуеті жоғары. Іргесінде темір жол стансасы бар әрі облыс орталығына жақын орналасқан. Мектеп – маңызды инфрақұрылымдық нысан. Сол арқылы жас мамандарды, жас отбасыларды тартып, ауылға жан бітіруге болады. Бұл – елді мекеннің дамуына тың серпін береді», дейді Алматы облысының әкімі Марат Сұлтанғазиев.
– Бүгін отбасым үшін қуанышты күн. Осы уақытқа дейін бірнеше мектеп құрылысының басы-қасында жүрсем де дәл бүгінгідей толқыған емеспін. Өйткені бұл ауылда әкем Алдаберген туып-өскен. Жаңа мектепті ұлым Дәурен салып беріп отыр. Оның бұл ісі көңілімді көкке көтерді. Осы ауылдың мектебінен білім алып, болашаққа қанат қаққан ұл-қыздарымыздың мықты азаматтардың қатарына қосыларына сенемін, – деді Қанат Бозымбаев.
Сондай-ақ «Халық игілігі» қоғамдық қоры мектеп ұжымына «Suzuki» маркалы автокөлікті сыйға тартты. Сонымен қатар көпбалалы әрі әлеуметтік осал топтан шыққан 12 баланы мектепке даярлап, оқу құралдарымен және мектеп формасымен қамтамасыз етті.
Заманауи мектепте 24 оқу кабинеті, 3 зертханалық (физика, биология, химия және информатика) кабинет, компьютерлік сынып, 2 шеберхана, акт және спорт залдары, жаттығу алаңы, сондай-ақ 60 орындық асхана мен медициналық кабинет, кітапхана бар.
Жалпы, Алматы облысында биыл 15 750 орындық 16 мектептің құрылысы жоспарланған. Оның 9-ы 1-қыркүйекте ашылды. Қалған 5 мектептің құрылысы жыл соңына дейін аяқталады.
Алматы облысы
