Аймақтар • 17 Қыркүйек, 2023

Торғайдағы сенбілік

202 рет
көрсетілді
1 мин
оқу үшін

«Kieli tabigat» республикалық акция аясындағы сенбіліктерді өңірде бірінші болып Амангелді ауданы бастады. Аудан тұрғындары «Арқалық – Торғай» тас жолының бойындағы Кейкі батыр кесенесінің іші-сыртын жуып-сүртіп, маңайын тазартты.

Торғайдағы сенбілік

Мәдениет және ақпарат ми­нистр­лігі мен жастардың қоғамдық бірлестіктері мұрындық болған экологиялық акцияға Амангелді ауылының жастары мен батыр ес­керткішіне жақын орналасқан Тасты ауылының тұрғындары атсалысты.

– Осы жолмен әрі-бері ағылып жатқан көліктер Кейкі бабамыздың кесенесіне бұрылмай кетпейді. Жолаушылардың көбі кесене басына тоқтап, құран оқып, дұға бағыштайды. Оның сыртында, алыстан арнайы келіп кететін кісі­лер бар. Бүгін, міне, аудан орта­лығынан жиырма шақты белсенді жас келіп, оларға біздің ауылдың тұрғындары қосылып, кесененің аумағындағы шөпті жұлып, қоқыстан тазарттық. Іші-сыртының шаңын сүртіп, еденін жудық, – дейді Тасты ауылдық округінің әкімі Еркін Қапышев.

Акцияны ұйымдастыру­шы­лар­дың айтуынша, аудан орталығында да дәл осындай тазалық іс-шаралары қолға алынып, Амангелді батыр мен Сатыбалды ишан кесенелерінің аумағы, сондай-ақ Амантоғай ауылы маңындағы өзен жағалауын тазарту жұмыстары жүргізілген.

Республикалық акциясы аясын­дағы тазалық жұмыстары әлі де жалғасады. Өйткені өңірде мың­нан астам тарихи-мәдени ескерт­кіш бар. Оның он шақтысы жал­пыұлттық маңызы бар нысандар санатына енген. Оған жергілікті маңызға ие 28 ескерткішті қосы­ңыз. Жастар ресурстық орталық­тарының өкілдері алдағы сенбіде Қостанай ауданындағы Ыбырай Алтынсарин кесенесі мен Барақ батыр кесенесінің айналасын тазартуды жоспарлап отыр.

 

Қостанай облысы