Аймақтар • 21 Қыркүйек, 2023

Іскер әйел ескерткіші

268 рет
көрсетілді
2 мин
оқу үшін

Орал қаласында қала күні мерекесіне орай ұйымдастырылған іс-шаралар аясында қазақтың іскер әйеліне арналған «Арман құсы» атты ескерткіш орнатылды. Ескерткіш орналасқан Абай даңғылы бойындағы саябақ та жаңадан абаттандырылған.

Іскер әйел ескерткіші

Суретті түсірген Бекжан ЖҰМАБАЙ

Тот баспайтын асыл болаттан жасалған ескерткіш композициясында бейнеленген ұлттық камзол киген, салпыншақ сырға таққан қазақ қызы гранит тастың үстінде жоғары қарап қиялдап отырғандай. Биік өкше әдемі туфлиі, тізесінде тұрған ноутбук оның өзіне сенімді, іскер, алғыр қалпын сипаттап тұр. Кейіп­кер­дің алға созған сол қолының саусағына әлдебір құс қонақтай қалыпты.

– Жергілікті іскер әйелдер кеңесінің өкілдері ақпан айында жолығып, Ақ Жайық өңірінің іскер әйелдері қауымдастығы атынан облыс орталығына бір ескерткіш сыйға тартқысы келе­тінін айтты. Әрине, олардың барлық тілегін ескере отырып осы шығарманы жасап шықтық. Ескерткіш «мәңгі металл» деп аталатын материалды пісіру ар­қылы жасалған. Бұл – тот бас­пайтын, өте берік металл. Мұны жасап шығуға жарты жылдан аса уақыт кетті. Мүсіннің бір бүйіріне ақын Мұнайдар Балмолданың бір шумақ өлеңі жазылды. Маған бұл композицияның тұрған жері де ұнап тұр: жақын маңда ірі сауда орталығы бар, адам аяғы үзілмейтін, шулы, іс­кери орта. Осы шығармашылық жұмысымыз арқылы сүйікті Орал қаламыздың көркейе түсуіне үлес қоссақ, ние­ті­міздің ақталғаны деп біле­міз, – дейді мүсіннің авторы, Сурет­шілер одағының мүшесі Ерғали Бекешов.

Елордадағы «Ас­та­наның құрдасы» кеше­ні­нің авторы Ерғали Бекешовтің қолынан шыққан ерек­ше мүсіндер Орал мен Ақсай қала­ларында, өңірдегі аудан орталықтарында көпшіліктің көзайымына айналған. Ал дәл осы жаңа мүсіннің шы­ғынын Ляна Тұрсынова, Дариға Жұмагелдиева, Балзия Евенеева, Тоғжан Бабиева, Аина Баемирова, Динара Қазиева сынды іскер қыз-келіншектер және Батыс Қа­зақ­стан облыстық Қо­ғамдық та­­мақтандыру қауым­дас­тығы кө­те­­­ріпті.

– Біздің кеңестің құрамында 2 500-дей кәсіпкер қыз-келіншек бар. Бүгінгі ескерткіш өңір эко­но­микасының дамуына үлес қо­сып жүрген іскер әріптестеріме лайықты тарту деп ойлаймын, – дейді Батыс Қазақстан облыстық іскер әйелдер кеңесінің төрағасы Ляна Тұрсынова.

 

Батыс Қазақстан облысы