Ресейлік теннисші Александра Пановамен жұп құрап өнер көрсеткен отандасымыз алғашқы айналымда нидерландтық Арианне Хартоно мен аустралиялық Оливия Тьяндрамулияны жарыс жолынан тайдырды. Осы доданың 2-ракеткасы болып тіркелген қазақстандық-ресейлік жұп екі сетке жалғасқан матчта қарсыластарынан 6:4, 7:5 есебімен басым түсті. А.Данилина мен А.Панова ширек финалда қытай қыздары – Ханью Гуо және Цзян Синьюмен шеберлік байқасады.
Өкінішке қарай, дәл осы турнирдің жекелей сынында өнер көрсеткен әйелдер арасында еліміздің екінші ракеткасы, әлемдік рейтингте 73-орында тұрған Юлия Путинцева екінші айналымнан әріге аса алмады. Ол алғашқы кезеңде дүниежүзілік рейтингте 248-орында тұрған аустралиялық Дарья Савиллді екі сетте 6:1, 6:4 есебімен жеңгенімен, екінші айналымда жарақатына байланысты жарысты ерте аяқтауға мәжбүр болды.
