Қоғам • 27 Қыркүйек, 2023

Егін жинау науқаны: Диқандар егіннің 60%-ға жуығын жинады

180 рет
көрсетілді
3 мин
оқу үшін

Қазақстанда 10,3 млн гектар егін жиналды, бұл жоспарланған алаңның 59,9%-ын құрайды. Бұл туралы Ауыл шаруашылығы министрлігінің баспасөз қызметі хабарлады, деп жазады Egemen.kz.

Егін жинау науқаны: Диқандар егіннің 60%-ға жуығын жинады

Фото: Ашық дереккөз

Министрліктің мәліметінше, 9,5 млн ауыл шаруашылығы дақылдары, оның ішінде 6,9 млн тонна бидай орылған.

«Биылғы вегетациялық кезеңде фермерлер бірқатар қиындыққа тап болды. Оңтүстік өңірлерде құрғақшылық болды, ал солтүстігінде жаңбыр жауды. Бұл егіннің жай-күйіне және жиналған дақылдың сапасына кері әсер етті. Ауа райының қолайсыздығына қарамастан, астықтың күтілетін өнімі Қазақстанды нан, ұн және макарон өнімдерімен толық қамтамасыз етуге жеткілікті болады. Елімізде өткен жылғы жоғары сапалы астықтың мол қоры бар. Өнімділіктің төмендеуіне байланысты экспорттық әлеует төмендейді, алайда республика дәстүрлі экспорттық нарықтардағы өз позициясын сақтайды», делінген ведомство мәліметінде.

1-ші сұрыпты ұннан жасалған бидай нанының бағасын тұрақтандыру үшін Азық-түлік корпорациясы ішкі нарықты реттеу қызметі арқылы азық-түлік астығын сатады. Бұл механизм алғаш рет өткен жылы қолданылған болатын. Биыл да жалғасады. Нәтижесінде нан пісіру кәсіпорындары шикізатпен қамтамасыз етіліп, нан отандық нарыққа белгіленген бағамен шығады.

Қазір маңызды міндет – фермерлерге қажетті қолдау көрсету. Атап айтқанда, астықты кептіру үшін жеңілдетілген дизель отынын бөлу мәселесі пысықталды. Облыстардың астық кептіруге арналған отынға жалпы қажеттілігі 73 мың тонна. Оның 19 мың тоннасын қолда бар резерв есебінен жабу жоспарланып отыр.

Барлық астық қабылдау кәсіпорындарының астықты қабылдауға дайындығы қайта тексерілді. Олардың тәулік бойы жұмыс істеуін қамтамасыз ету тапсырылды. Әкімдіктер астық кептіру қызметінің бағаларын көтермеу мәселесін бақылауға алды, тарифтерді негізсіз көтеру фактілері анықталса тиісті шаралар қабылданады. Республика бойынша астықты сақтаудың жалпы сыйымдылығы 29,9 млн тоннаны құрайды.

Сондай-ақ фермерлер үшін айыппұл санкцияларын қолданбай несиелерді төлеу мерзімін ұзарту мәселелері жеке пысықталып жатыр, бұл болашақта олардың несие тарихының бұзылмауына мүмкіндік береді. 

Азық-түлік корпорациясы қолда бар астық қорының тұқым ретінде пайдалану жарамдылығына сараптама жасауды бастады. Параметрлерге сәйкес келетін астық бөлек жиналады. Облыстардың өтінімдері бойынша мұндай астық тұқымдары егін егетін фермерлерге тауарлық кредит ретінде беріледі.

Өз кезегінде, жоспар бойынша 1,9 млн тонна астық тұқымы қажет болса, қазір оның 695,4 мың тоннасы немесе 35%-ы жиналды. Соңғы жылдардағы талдау көрсеткендей, егілген тұқымның шамамен 60%-ы отандық үлеске тиесілі.