Оқиға • 27 Қыркүйек, 2023

Жыл басынан бері 229 адам өрттен қаза тапты

238 рет
көрсетілді
1 мин
оқу үшін

Қазақстанда жыл сайын 10 мыңнан астам өрт болады. Бұл туралы ҚР Төтенше жағдайлар министрлігіне қарасты Өртке қарсы қызмет комитеті төрағасының орынбасары Марғұлан Аманбаев Орталық коммуникациялар қызметінде өткен брифинг барысында айтты, деп хабарлайды Egemen.kz.

Жыл басынан бері 229 адам өрттен қаза тапты

«Елімізде жыл сайын 10 мыңнан астам өрт болып, үш жүзден астам адам қаза табады. Бұл ретте өрт пен өлімнің негізгі үлесі тұрғын үй секторында тіркелді», деді Марғұлан Аманбаев.

Сондай-ақ ол республикада осы жылдың 1 қазанынан бастап жылыту маусымы басталатынын айтты. Жыл басынан бері ел бойынша 7560 өрт оқиғасы тіркеліп, 229 адам қаза тапты.

«Өткен жылмен салыстыратын болсақ, өрт 6,8 пайызға, адам өлімі 6,5 пайызға өскен. Өңірлер бойынша статистикаға көшетін болсақ, өрттің өсуі Абай (46%), Алматы (33%), Қостанай (26%), Жамбыл (20%) облыстарында байқалады. Қайтыс болғандар саны Жамбыл облысында (11 жағдай), Шығыс Қазақстанда (9 жағдай), Шымкент (8 жағдай) және Алматы қалаларында (5 жағдай) өсті», деді Марғұлан Аманбаев.

Сондай-ақ ҚР Төтенше жағдайлар министрлігі Өртке қарсы қызмет комитеті төрағасының орынбасары бүгінгі күні тұрғын үй секторында жарақат алу фактілері тіркелгенін атап өтті.

Мәселен, Семей қаласында қыркүйек айының өзінде қатты отынмен жылытатын пешті пайдалану ережесін бұзу салдарынан төрт адам уланып, ауруханаға жатқызылған екі оқиға тіркелді.