Кино • 27 Қыркүйек, 2023

Брюссель «Дос-Мұқасан» фильмін тамашалады

220 рет
көрсетілді
2 мин
оқу үшін

Өткен сейсенбі күні Брюссельдегі «Cinema Palace» кинотеатрында «Дос-Мұқасан» фильмі көрсетілді. Мәдени іс-шара Қазақстанның Бельгиядағы елшілігінің қолдауымен өтті. Фильм қазақ тілінде ағылшын субтитрімен ұсынылды.

Брюссель «Дос-Мұқасан» фильмін тамашалады

Картинаны тамашалауға Бель­гияда тұратын қазақ қа­уымының өкілдері, сондай-ақ қызығушылық танытқан жер­гілікті халық келді. Көрер­мен­дердің бірі Ферисел Ливию «Дос-Мұқасан» фильмін көргеніне қуанышты екенін жет­кізді. Ол ансамбль мүшелері Қазақ­станға танымал тұлғалар екенін, сонымен қатар оның құрылуының үл­кен тарихы барын айтты. Сон­дық­­тан Бельгия тұрғыны кино­театр­ға аса қызығушылықпен келген.

Еліміздің Бельгиядағы Тө­тенше және өкілетті елшісі Мар­ғұлан Бай­мұхан «Дос-Мұқасан» филь­мінің Еуропа астанасында көр­се­тілуі – тағы бір тамаша мәдени оқиға екенін атап өтті. «Бүгін еуро­палық және бель­­гиялық көрер­мен үшін аты аңыз­ға айналған «Дос-Мұқасан» ансамблі туралы қызықты фильм көрсетілді. Оны біздің елде бірнеше буын өкілдері біле­ді және шығармаларын сүйіп тың­дайды. Режиссер Айдын Саха­ман түсірген, ансамбльдің ұзақ та, қызықты жолын баяндай­тын фильмді еуропалық жұртшы­лық жоғары ықыласпен қабыл­да­ды. Бельгиялық көрермен­ге «Дос-Мұқа­сан» туралы түсі­рілім ұнады деп ойлаймыз. Осы игі дәстүрді жалғастыра­мыз деп ойлаймын», деді Марғұлан Баймұхан.

Айта кетейік, түсірілім жеті айға жуық уақытқа созылды. Фильм 2022 жылы шықты. Сценарийін жазған – Ефрат Шә­рі­пов, продюсері – Айгүл Бай­бек, музыкалық жетекшісі – Айдын Сахаман. Актерлік құрам портреттік ұқ­сас­тық бойын­ша таң­дал­ған. Бас­ты рөлдерде актер Ме­йір­ғат Амангелдин, Мақсат Сәби­тов, Елдос Шайкенов, Саят Мақұл­баев, Айғаным Сағын­баева, Никита Погодаев, Нұрғиса Қуанышбайұлы және Әбілмансұр Серіков ойнады.Танымал блогерлер мен вайнерлер Артур Асқарұлы мен Зухра Сайпи де дебюттік рөлін ойнап шықты.

«Дос-Мұқасан» фильмінің жа­бық көрсетілімі өткен жыл­дың 27 қыркүйегінде болды. Ал екі күн­­нен кейін Қазақстанның бар­лық кинотеатрларына прокатқа шықты.

«Дос-Мұқасан» — 1967 жы­лы құрылған эстрадалық вокалды аспаптар ансамблі. Негізін қала­ған – Досым Сүлеев, Мұрат Құса­йынов, Хамит Санбаев, Александр Литвинов. Топтың атауы да осы әншілердің есімінен құралған. Әр жылдары ансамбль құрамында Бақытжан Жұмаділов, Мейірбек Мол­да­беков, Шәріп Омаров, Құр­ма­най Омарова, Нұртас Құсайынов, Ақжол Мейірбеков және тағы бас­қа­­лар болды.