Бәсекенің бірінші күнінде кортқа жарыс ұйымдастырушыларынан Wild card алған отандасымыз Тимур Мәуленов шығып, алғашқы айналымда-ақ сүрінді. Маңызды жарыстағы тұсаукесер кездесуін әлемнің 84-ракеткасы франциялық Александр Мюлермен өткізген отандасымыз қарсыласынан екі сетте – 4:6, 2:6 есебімен жеңіліп қалды.
Сондай-ақ жарыстың бірінші күнінде кортқа шыққан ресейлік Әлібек Качмазов (әлемнің 319-ракеткасы) мажарстандық Фабио Марожанды (92) 6:2, 6:4 есебімен жеңсе, Беларусь өкілі Егор Герасимов (664) бельгиялық Зизу Бергсті (172) екі сетте 6:4, 6:4 есебімен оңай жеңді. Бергс 2021 жылы Алматыда өткен «Челленджер» санатындағы турнирдің финалында жерлесіміз Тимофей Скатовтан басым түскенін айта кеткен жөн.
Сонымен қатар алғашқы айналымда жапониялық Таро Даниэль, италиялық Стефано Наполитаноны (7:5, 7:6), аустриялық Игорь Родионов, ресейлік Евгений Донскойды (6:1, 6:2) тағы бір жапониялық теннисші Шо Шимбакюро Грузия өкілі Саба Пуртселадзені (6:0, 2:6, 6:2), бельгиялық Киммер Копьянс, Жаңа Зеландия өкілі Рубин Стэтхемді (6:4, 0:1), Босния және Герцеговина спортшысы Дамир Джумхур, чехиялық Доминик Паланды (7:6, 6:3) жеңіп, келесі айналымға жолдама алды.
