Өңірлік IT-хабтар инновациялық жобаларды дамытып, ақпараттық технологиялар саласында білікті мамандар даярлауға көмектеседі. Стартап, ментор, инвесторларды біріктіреді.
IT-хаб – IT қауымдастығын құруға арналған ерекше кеңістік. Инкубациялық кезеңде стартап-жобаларды әзірлеуде қалыптасқан бірегей жүйе бар. Яғни кәсіпкерлікті, қаржылық есеп жүргізуді үйретіп, инвестициялар тартуға көмектеседі.
– Қазір барлық өңірде IT-хабтардың қызметін дамыту және түрлі іс-шараларды ұйымдастырумен айналысатын комунити-менеджерлер жұмыс істейді. Өңірлерде «Digital nomands» серіктестігінің сабақтары және «Google Def» ұсынған бейресми кездесулер жиі өткізіледі. Бүгінгі таңда өңірлік хабтарда 7 мыңнан аса адамның қатысуымен 300 іс-шара өткізілді, – деді «Astana Hub» халықаралық технопаркі Өңірлік даму кеңсесінің директоры Аида Досова.
Өңірлік IT-хабтарды дамыту – «Astana Hub»-тың басым міндеттерінің бірі. Биылғы мақсат – бүкіл ел бойынша 14 өңірлік IT-хаб ашу. Мемлекет басшысы Қасым-Жомарт Тоқаев өңірлік деңгейде инновациялық экожүйені кеңейтудің маңыздылығы туралы жиі айтады.
– Менің цифрландыру ісіне және инновацияны енгізу мәселесіне баса мән беретінімді баршаңыз білесіздер. Біздің маңызды стратегиялық міндетіміз – Қазақстанды ІТ-мемлекетке айналдыру. Цифрландыру ісінде нақты жетістіктеріміз де жоқ емес. Біз электронды үкіметті және финтехті дамыту индексі бойынша әлем көшбасшыларының қатарында тұрмыз. 2026 жылға қарай ІТ қызметтерінің экспортын 1 млрд долларға жеткізу – Үкіметке жүктелетін жаңа міндет, – деген еді Президент.
Бұл мақсатта Цифрлық даму, инновациялар және аэроғарыш өнеркәсібі министрлігі мен «Astana Hub» және жергілікті атқарушы органдар айтарлықтай жұмыс атқарды. Жыл басынан бері еліміздің мына өңірлерінде – Семей, Қызылорда, Талдықорған, Тараз, Өскемен, Орал, Түркістан, Ақтөбе, Қостанай, Көкшетау, Павлодар, Ақмолада IT-хабтар ашылды.
