Аталған бәсекеде еліміздің бес спортшысы бақ сынап жатыр. Жарыстың іріктеу кезеңінен бастаған әйелдер арасындағы Қазақстанның екінші, әлемнің 73-ракеткасы Юлия Путинцева негізгі бәсекенің бірінші айналымында әлемнің 30-ракеткасын тізе бүктірді. Чехиялық Мария Боузковамен шеберлік байқасқан отандасымыз қарсыласынан екі сағат 7 минутқа созылған тартысты бәсекеде 6:2, 7:6 (7:5) есебімен басым түсті. Юлия матч барысында 13 брейк-пойнттың бесеуін пайдаланса, қарсыласы 2 эйс пен 3 брейк (9 брейк-пойнт) жасады. Енді Ю.Путинцева 1/8 финалға шығу үшін әлемнің 10-ракеткасы франциялық Каролин Гарсиямен кездеседі.
Ал кеше кешкісін еліміздің бірінші ракеткасы Елена Рыбакина алғашқы айналымда Қытайда өтіп жатқан Азия ойындарының жекелей бәсекесінде топ жарған қытайлық Синвэнь Женмен ойнап, жеңіске жетті. Сондай-ақ ерлер арасында бақ сынап жатқан жерлестеріміз – Денис Евсеев, Михаил Кукушкин және Бейбіт Жұқаев іріктеу сайыстарының жартылай финалдық кездесулерін өткізді.
