Өткен сейсенбі күні БАҚ өкілдері толық жөнделген, қайта түлеген қала әкімдігінің ғимаратын көруге барды. Тәуелсіздігіміздің таңына куә болған тарихи нысанды қалпына келтіру жұмыстары Мемлекет басшысының тапсырмасымен 2022 жылдың ақпан айында басталған еді. Өйткені «Қаралы қаңтар» күндерінде әкімдіктің 6 қабаты, 4 павильоны өртке оранған. Сол кезде жертөлдегі өртке қарсы жүйе іске қосылып, шылқып суға батқан ғимараттың 80 пайызы жарамсыз болып қалды. Қазіргі таңда Алматы әкімдігі ғимаратының тарихи келбеті сақтала отырып, заманауи технология мен құрылыс стандарттарымен жаңғыртылды. Қасбеттегі жұлдыздың орнына бейбітшілік тұтастығының, мемлекет пен отбасы негізінің ұлттық символы болған шаңырақ бейнесі пайда болды. Ең бастысы, күрделі жөндеу жұмыстары кезінде алдымен әкімдік қызметкерлері мен келушілерінің қауіпсіздігі ескерілді.
ҚазҚСҒЗИ сарапшылары ғимараттың зілзалаға төзімділігін зерттеп, нақты ұсыныстардан кейін сейсмикалық күшейтудің барлық амалы толық жүргізіліп, өрт қауіпсіздігі шаралары сақталды. Ендігі жерде ғимараттың ішкі безендірілуінде отқа төзімді, жанбайтын материалдар пайдаланылып, бұрын болмаған жаңа түтін шығару жүйесі, өрттің мекенжай жүйесі-ескерту орнатылды. Өрт кезінде жалынның таралуына жол бермейтін арнайы қақпақтар бірден іске қосылады. Оған қоса қауіпсіздік шараларын күшейту мақсатында ғимаратқа кіруді бақылау жүйесі, отқа төзімді есіктер, ғимаратқа бірінші қабаттағы терезелер арқылы рұқсатсыз кіруді шектейтін қосымша жапқыштар, әр қабатты айналдыра бейнебақылау камералары орнатылды. Қызметкерлердің кіруі үшін турникет құрылғысына тану жүйесі орнатылған.
Құрылыс барысында тиімді энергия тұтыну технологиясы қолданылып, жаңа жылыту жүйесіне толығымен ауыстырылды. Барлық инженерлік коммуникация автоматтандырылған және бірыңғай диспетчерлік пунктке қосылған. Бұл жұмысты бақылауға, энергия тиімділігін қамтамасыз етуге мүмкіндік береді. Диспетчерлер озық үлгідегі стансаның көмегімен барлық жүйені басқарады, төтенше жағдай туындаған кезде жедел әрекет етеді.
Ғимаратты қалпына келтірудің тағы бір маңызды өлшемі – инклюзивті шешімдер. Атап айтқанда, мүмкіндігі шектеулі жандарға арналған жедел сатылар, электркөтергіштер, мүгедектерге арналған жуынатын бөлмелер мен қозғалуы қиын адамдарға арналған құрылғы – таңбалау, пандустар, шақыру түймелері, Брайль әліпбиі де пайда болды. Әкімдіктің бірінші қабаты «Open space Almaty» болып қайта жаңартылды. Мұнда қабылдау бөлмесі, күту аймағы, келіссөздер, халықты қабылдау, ана мен бала, балаларға арналған ойын алаңы бар қоғамдық қабылдау бөлмелері орналасқан. Ғимараттың жалпы аумағы – 33 мың шаршы метрден астам, 700 орынға есептелген 360 кабинет бар. Күрделі жөндеулерден кейін де кабинеттердің ауданы өзгеріссіз қалған. Ғимаратта 14 басқарма мен әкім аппараты орналасады. Ғимараттың тарихи келбеті 99 пайыз сақталды.
Сол сияқты жобаны іске асыру барысында өз елімізде жасалған жиһаздар мен басқа да сәндік бұйымдарды сатып алуға мән берілгенін атап өткен жөн. Қасбеттің жоғарғы жағындағы «жұлдызды» «шаңырақпен» ауыстыру ұлттық нақышты ұлықтау мақсатында қабылданған шешім екенін түсіндіріп отырудың өзі артық. Ал мұны жаңа дәуірдің, жақсылықтың нышаны деп білейік.
АЛМАТЫ
