«Samruk-Kazyna Construction» АҚ басқарма төрағасы Мәулен Айманбетов Қарағанды облысына барған сапарында «Жайлы мектеп» жобасының жүзеге асырылу барысын тексерді. Қарағанды өңірінде жоба аясында 18 мектеп салынады. 10 жайлы мектептің құрылысы биыл басталып, 2024 жылы пайдалануға берілуге тиіс. Қалған 8 мектеп 2025 жылға жоспарланған. Ұлттық жобаның нәтижесінде облыс бойынша 12,5 мың қосымша орын ашылады.
Алайда «Астана-Көктем С» компаниясы жауапкершілік алған Бұқар жырау ауданы Үштөбе ауылындағы 300 орындық және «AN Groups» компаниясы салуға тиіс «Голубые пуды» шағын ауданындағы 1 200 орындық жайлы мектептердің жұмыстары өте ақырын жүріп жатыр. Аталған мердігерлерге қатаң ескерту жасалды.
– Құрылысқа дайындық жұмыстары мен техниканы жұмылдыру қарқыны әлсіз. Жұмысты екі ауысымда ұйымдастырып, барлық үдерісті жеделдетіп, қосымша техника жұмылдырып, мамандар мен жұмысшыларды көбірек тарту керек. Бекітілген мерзімдерді қуып жетпесеңіздер, келісімшартты бұзуға тура келеді. Құжаттарды уақытында тапсыруы керек. Егер жақын арада жағдай түзелмесе, барлық атқарушылық құжаттаманы ретке келтірмейінше жұмыстарды тоқтатуға мәжбүр боламыз. Ескі жұмыс тәсілдерінен бас тартыңыздар, бәрі ережеге сәйкес болуға тиіс. Сондай-ақ жұмыс барысын жеделдетіп, екі ауысым ұйымдастыру керек, өйткені қыс жақындап келеді, – деді М.Айманбетов.
«Samruk-Kazyna Construction» басшысы Ғ.Мұстафин ауылына қарасты Нұра стансасындағы мектептің құрылыс жұмыстарын тоқтатуға бұйрық берді. Себебі онда геологиялық зерттеулер жүргізу кезінде кемшіліктер кеткен. Сондай-ақ ол «Гүлдер» шағын ауданындағы «Стинк ТФК» компаниясы салып жатқан 1 200 орындық жайлы мектептің құрылыс алаңында болып, мектеп учаскесінің аумағы тар екенін, білім ошағының кіреберіс кең болуы керегін атап өтті. Ал «BiGlobal» ЖШС салатын «Кең дала» шағын ауданындағы 2 000 орындық жайлы мектептің спорт алаңын талаптарға сай жарақтандыру үшін аумақтың бас жоспарын қайта қарауды тапсырды.
