Қалалық әкімдік таратқан мәліметке сүйенсек, қазіргі күнде Семейде көмір тоннасы көтерме бағамен 2 нүкте бойынша сатылады. 28 500 тонна көмір жеткізілген қаланың кіреберісіндегі «Жігер» ЖШС нүктесінде 1 тонна көмірдің құны – 12 700 теңге болса, «72 квартал» аумағындағы баға 12 500 теңгеден босатылады. Оның үстіне көлік тасымалы қызметіне 2 000 теңге қосылады. Қала билігі, сондай-ақ жекелеген аулаларда ЖК құжаты болған жағдайда ғана көмір сатуға рұқсат берілгенін айтады.
Алайда жалпы облыс бойынша көмір бағасы аудандардың орналасу ерекшеліктеріне қарай қымбаттай түсетінін жасыруға болмас. Аягөз, Үржар, Ақсуат аудандарына тасымалдану қызметін қоса алғанда тоннасы 18 мың теңгеден 28 мың теңгеге дейін шарықтап тұр. Аягөз қаласындағы көмірдің көтерме бағасы 14 800 теңге шамасында болғанымен, басқа аудандарға жүк көліктерінің иелері тоннасын екі есе бағасына өткізіп жүр.
