Зайсан ауданының құрылғанына биыл 95 жыл. Осынау мерейлі датаға орай өңірде түрлі шаралар қолға алынған. Соның бірі – қазақтың бекзат өнері құсбегілер сайысы. Сауырдың бауырында Ақынбек ақсақалдан басқа бүркіт баптап отырған ешкім жоқ. Десе де аудан әкімдігінің қолдауымен бүркітшілер сонау Атырау, Алматы, Абай, Ақмола, Қарағанды, Ақтөбе облыстарынан келген.
Турнирдің ашылу салтанатында Қазақстан Республикасы «Құсбегілік» федерациясының вице-президенті Бағдат Мүптекқызы, Қазақстанның құсбегіліктен мемлекеттік жаттықтырушы Күнтуған Базарбек, «Шығыс Алтай» бүркітшілер федерациясының төрағасы Тәттімбет Кәпұлы сөз сөйлеп, сайысқа қатысушыларға сәттілік тіледі.
Шараның алғашқы күні құмай тазылардың жарысы өткен. Оған ұзын саны 26 тазы қатысып, ұшқырлықтары, ептіліктері, қырағылықтары сыналды. Нәтижесінде, I орынды Жанат Ахатовтың тазысы «Сағым», II орынды Алижан Нұрмұхаметовтің тазысы «Сұңқар», III орынды Айдын Асқарбекұлының тазысы «Тұйғын» иеленді. Ал құсбегілердің сайысында I орынды Атырау облысынан келген Арман Қошқарбеков жеңіп алды. Жүлделі II орынды да Атырау облысының бүркітшісі Сармат Абдукаримов иеленді. III орынды Астанадан келген Күнтуған Диас қанжығаға байлады. Ителгі мен қаршыға сайысында жүлделі орындарды Қарағанды, Атырау, Абай, Шығыс Қазақстан облыстарының құсбегілері алған.
Жеңімпаздарға аудан әкімінің атынан ақшалай сыйлықтар, кубог, медальдар және Зайсан ауданының 95 жылдық мерейтойына арналған төсбелгілер тапсырылды.
Шығыс Қазақстан облысы,
Зайсан ауданы
