Ұлттық құрама ойындарына байланысты «Қайрат» пен «Зенит» қысқамерзімді үзілісті тиімді пайдаланып, жанкүйерлерге тамаша матч сыйлады. 20 мыңнан аса жанкүйер тамашалаған Орталық стадиондағы ойын тең есеппен аяқталды – 2:2. Аса тартысты өткен кездесудің есебін бірінші болып «Қайрат» футболшылары ашты. Ойынның 8-минутында «Қайраттың» бразилиялық шабуылшысы Жоао Пауло гол соқса, 29-минутта қонақтар сапынан Александр Ерохин есепті теңестіріп кетті. Бірінші тайм 1:1 есебімен аяқталды.
Үзілістен кейін «Зениттің» бас бапкері Сергей Семак алаңға бразилиялық ойыншыларын шығарып, жеңіске жетуге тырысып көрді. Бірақ екінші таймдағы алғашқы голды да «Қайрат» футболшылары соқты. 70-минутта Офри Арад командасын есепте тағы да алға шығарғанымен, ресейлік команда матчтың аяқталуына бес минут қалғанда таразы басын қайта теңестіріп кетті. Бұл жолы Густаво Мантуан дәлдік танытты – 2:2. Осылайша, екі клуб арасындағы үшінші жолдастық кездесуде «Қайрат» бірінші рет «Зенитпен» тең ойнады. Мұның алдындағы екі матчта да «Зениттің» мерейі үстем болған еді.
