Қайрат Нұрдәулетов жаттықтыратын еліміздің жастар құрамасы бірер күн бұрын ғана Өзбекстан жастарымен тең ойнаған (0:0) Испания футболшыларын жеңе алмады. «Астана Арена» стадионында өткен топтық кезеңнің үшінші тур ойынында жерлестеріміз қарсыластарына 4:0 есебімен жол берді. «Қызыл фурия» сапынан бірінші таймда «Барселона» футбол клубының түлегі Фермин Лопес мергендігімен көзге түссе, екінші таймда Темірлан Анарбеков («Қайрат») қорғаған қақпаға «Валенсия» футболшылары Диего Лопес пен Фран Перес, «Алавес» клубының ойыншысы Саму бір-бір мәртеден саңылау тапты.
Осылайша, Қазақстан жастар құрамасы 2025 жылғы Еуропа іріктеу кезеңіндегі үшінші ойынын өткізіп, қатарынан үшінші матчта жеңілді. Мұның алдында жерлестеріміз сырт алаңда Мажарстан (2:0) және Бельгия (1:0) құрамаларына жол берген еді. Жерлестеріміз келесі ойынын 16 қараша күні сырт алаңда Мальта құрамасымен өткізіп, осы жылғы ойындарын аяқтайды.
