Сән көрсетілімінде сақ-массагеттердің аты аңызға айналған ханшайымы Тұмардың образы ұлықталды. Ханшайымның есімі парсы патшасы Кирді шайқаста ойсырата жеңумен тарихта қалған. Тұмар ханшайым көшпелі тайпалардың басын құрап, жауларына лайықты тойтарыс беріп, халқының бостандығын сақтаған.
«Bozjyra Fashion Week» көрсетілімі арқылы тарихта өшпес із қалдырған түркі әлемінің нағыз батырлары туралы айтқымыз келеді. Бұл батырлар бүкіл халықты достықпен, бостандық рухымен, бір-біріне және түркі мұрасына махаббатпен біріктіре білген тұлғалар. Бұл маусымда еліміздің және шетелдік дизайнерлер қатысатын үлкен Fashion Show өткіздік», дейді ұйымдастырушы Лурена Доскеева.
Ұйымдастырушылардың айтуынша, «Bozjyra Fashion Week» сән апталығын өткізудегі тағы да бір негізгі мақсат – өз істерін жаңадан бастап жатқан талантты дизайнерлерге қолдау көрсету.
«Ақтау қаласында мұндай апталық кең ауқымда алғаш рет өтті. Бұл болашақта әлемдегі этностық сәнге әсер ететін тұтас қауымдастық құра алатын түркі әлемінің брендтері мен дизайнерлерінің бірегей коллаборациясын құрудың тамаша мүмкіндігі», дейді PR-маман және «Collabo Me» шығармашылық коллаборация агенттігінің бас директоры Жәмила Хангелдина.
Сонымен қатар қазақстандық зергерлік бұйымдар бренді премиум топтамасын алғаш рет көрсетті. Бұл гауһар тастармен безендірілген таза күмістен жасалған шығарылымы шектеулі жаңа топтама. «Өйткені күміс – құнды металл, ал гауһар – ең бағалы тас. Біздің дизайн қазіргі қазақ әйелінің эстетикалық түйсігімен тығыз байланысты. Махаббат, өнер, дәстүрді әр әшекей өзімен бірге «алып» жүреді. Біз заманға сай интерпретацияланған тарихи тамыры бар әшекейлерді жасаймыз», дейді «Dimash Silver»зергерлік бұйымдар брендінің негізін қалаушысы Алтынай Әшірбаева.
