«Али-Сұлтан KZ» бөбекжай-балабақшасының құрылысы алдыңғы жылы басталған болатын. Жобаның жалпы құны – 110 млн теңге. «Мемлекет басшысы Қасым-Жомарт Тоқаев Қазақстан халқына арнаған Жолдауында балалардың мектепке дейінгі жан-жақты даму мәселесін шешу қажеттігін айтып, 2025 жылға қарай 6 жасқа дейінгі балаларды мектепке дейінгі тәрбиемен және оқытумен 100 пайыз қамтамасыз етуді міндеттеген болатын. Аталған міндетті орындау бағытындағы іргелі істер ауданымызда сәтті жүзеге асырылып келеді. Соның дәлелі – бүгін ашылған балабақша. Бұл ретте балғындардың бақытты болашағына қамқорлық танытып демеушілік жасап отырған азаматтарға алғысымыз шексіз», деді бөбекжай-балабақшаның ашылуына қатысқан Келес ауданы әкімінің орынбасары Сүлеймен Жылқыбаев.
«Али-Сұлтан KZ» бөбекжай – балабақшасы 2-6 жас аралығындағы 6 топқа бүлдіршіндерді жинақтап, 25 адам жұмыспен қамтылатын болады. Жалпы облыс бойынша 1381 мектепке дейінгі ұйым бар. Одан бөлек мектептерде 5-6 жастағы мектепалды топтарда 34056 бала тәрбиеленуде. Яғни қамту көлемі 98,5% болып отыр. Қазіргі таңда мектепке дейінгі білім беру ұйымдарының 77,1%-ы – жекеменшік. Ал Келес ауданы бойынша 97 балабақша бар. Оның 12-сі мемлекеттік, 85-і жекеменшік болып табылады. Бұл балабақшаларда 10 615 бала тәрбиеленуде.
Айта кетелік, Республика күніне орай облыстағы аудан-қалаларда 17 әлеуметтік маңызды нысан ашылады. Олардың қатарында Ордабасы ауданында жекеменшік «Ұлы Орда» мектебі, Жетісай ауданында футбол алаңшасы, Сарыағаш ауданында дәрігерлік амбулатория, Шардара ауданындағы мәдениет үйі сынды нысандар бар.
Түркістан облысы
