Суреттерде: 1. Академик-депутат Салық Зиманов «Қазақ Кеңестік Социалистік Республикасы мемлекеттік егемендігі туралы» декларациясын таныстырып тұрған сәт. 2. Декларация жарияланған «Социалистік Қазақстан» газетінің сарғайған парағы.
Қазақ КСР Жоғарғы кеңесінің екінші сессиясы 15 қазанда жұмысын бастады. Онда төраға Ерік Асанбаев декларацияның негізгі жобасы туралы баяндама жасап, құжат 17 қазан күні «Социалистік Қазақстан» және «Казахстанская правда» газеттерінде жарияланды.
Декларация жобасы 15-16 қазан күні талқылауға түсіп, оған 40-тан астам депутат қатысады. 16 қазанда 25 адамнан тұратын комиссия құрылып, төрағалығына академик, депутат Салық Зиманов сайланды. Орынбасарлыққа Жоғарғы кеңес төрағасының орынбасары З.Федотова мен Экономикалық реформа, бюджет және қаржы комитеті төрағасының орынбасары М.Оспанов ұсынылды. Комиссия құрамына академиктер Ж.Әбділдин, М.Қозыбаев, С.Сартаев, жазушы Ә.Кекілбаев, армия генералы С.Нұрмағамбетов, ҰҚК генералы, Шығыс шекара округінің қолбасшысы Е.Неверовский, тағы басқа депутаттардан тұратын 25 адам кірді.
25 қазан, 1990 жыл. «Қазақ кеңестік Социалистік Республикасы мемлекеттік егемендігі туралы» декларациясы он екінші шақырылған Қазақ КСР Жоғарғы кеңесінің екінші сессиясы ертеңгілік отырысының күн тәртібіне шығарылды.
