Сонымен қатар 450 келіге жуық синтетикалық есірткі тәркіленеді.
Заңсыз айналымнан алынғаннан кейін оларды не істейтінін ІІМ есірткі қылмысына қарсы іс-қимыл департаментінің бастығы Қажығали Имажанов айтып берді.
– Тәркіленген есірткі дереу сараптамаға жіберіледі. Сол үшін олардың әр партиясынан осы есірткінің аса үлкен мөлшеріне тең үлгі алынады. Ол қылмыстық іске қосылып, заттай айғақтар камерасына тапсырылады. Қалған есірткі полиция, прокуратура және денсаулық сақтау органдары қызметкерлерінің қатысуымен міндетті фото және бейне түсірілім жасала отырып, комиссиялық түрде жойылады. Сот үкімі күшіне енгеннен кейін іс бойынша дәлелдемелер ретінде өтіп жатқан есірткі үлгілері де жойылады, – деді Имажанов.
Спикердің сөзінше, есірткіні жою арнайы жабдықталған пештерде жүргізіледі. Қалған күл химиялық өңдеуден өтеді, бұл оларды толығымен жоюға мүмкіндік береді.
– Жойылғанға дейін полиция тәркіленген есірткіні қорғаудың күшейтілген шараларын қабылдайды. Бұл әсіресе құрамында есірткі бар өсімдіктердің салмағы бір факті бойынша жеті тоннаға жетуі мүмкін және есірткінің мұндай көлемін заттай айғақтар камерасында сақтау мүмкін болмайтын кезде, өсірілген қарасора дақылдарын жою кезінде ерекше маңызды, – деп атап өтті департамент бастығы.
Мысалы, қыркүйек айында Павлодар облысында есірткіге қарсы күресуші полицейлер 60 келіден астам ауған героинін тәркіледі – бұл еліміздің ішкі қара нарығындағы соңғы жылдардағы рекордтық партия. Оның құны 915 млн теңгеден асты.
Осы тәуекелдерді ескере отырып, полицейлермен қылмыскерлер ұсталып, героин тәркіленген сәттен бастап арнайы мақсаттағы жауынгерлер тартыла отырып, күзет ұйымдастырылды. Есірткі жою орнына да күшейтілген әскерилендірілген күзетпен жеткізілді.
Ведомствода түсіндірілгендей, қазір синтетикалық есірткінің жасырын өндірістерінен алынатын прекурсорларды жою өзекті болып отыр. Осы жылдың 9 айында есірткі өндірісінде қолданылатын 79 тоннадан астам химикаттар тәркіленді.
Нашақорлыққа және есірткі бизнесіне қарсы күрес жөніндегі 2023-2025 жылдарға арналған кешенді жоспарға сәйкес 2024 жылдың бірінші жартыжылдығында қылмыстық істер бойынша заттай айғақтар ретінде тәркіленген прекусорларды, улы заттарды және басқа да химиялық өнімдерді қауіпсіз жою үшін өнеркәсіптік субъектілерге өтеусіз негізде беру алгоритмдері әзірленетін болады.
