Әріптесіміз Арман Октябрь газеттің бүгінгі санында осыдан 35 жыл бұрын Алматы облысы, Кеген ауданы, Жалаулы ауылында болған таңғажайып оқиға туралы жазыпты. Қар суымен жуылып жер бетіне шығып қалған жылтырақ заттарды жеткіншектер таласа-тармаса қалталарына салып қамсыз кете берген.
«Есімде қалғаны 12 сәуір ғарышкерлер күні болатын. Арық тұсынан жылтыраған дүниелерді көрдік те өзара бөлісіп үйлерімізге тарап кеттік. Шыны керек, алтын деп ойлаған жоқпыз. Бірақ ертоқым, жүген сәндегенге таптырмайтын-ақ дүние екен деп ойладым. Үйге келіп киімдерімді шешіп, қайтадан мал суаруға бара жатып үлкендерге көрсеттім. Үшкір майда бұйымдар қалтама батқасын, тау етегіне лақтырып жібердім. Сол аралықта біз алтын тапқан жерге ауыл адамдары үйіліп алыпты. Мектеп директоры, ауыл басшысы, милиция қызметкерлері де осында жүр. Бұл тегін емес-ау деп ішім қылп ете қалды. Қысқасы, ертесі күні бәрімізді клубқа жинап тапқан заттарымызды қайтаруды талап етті. Алматыдан алтын тексеретін апараты бар археологтер келе жатқанын, сондықтан жасырып қалғандар жазаға тартылатынын жеткізді. Мен ұсақтарынан бөлек үлкен 4 бұйымды алғанмын. Біреуін атама сыйладым. Жиналыс кезінде жоқ деп мойындамадым. Балалық қой. Әкем партия адамы болатын. Тапқанымды тапсыруды бұйырды. Үйден біреуін алып келіп едім: «Қалғаны қайда?» деді. Содан тағы біреуін алып келіп ем, әлі де сенбеді. Ақыры төртеуін де әкеліп өткіздім. Қасымдағы серіктерім де тапқандарын түгел әкеліп берді», деп еске алды Ермек Мұхаммеджанов.
Алтын тапқан азаматтар сол тарихи күнді ауыл адамдары бүгінде аңыздай айтатынын, өздері үшін де бұл оқиғаның естен кетпейтін әсерлі сәт екенін тебірене жеткізген. Оларға сол тұста, тапқан жәдігерлерінің 25 пайызы, яғни 17 мың сом теңдей бөлінген екен. Кейіннен 4 бірдей «Романтик» магнитофоны сыйға тартылыпты.
Мақаланың толық нұсқасын оқу үшін мына сілтемеге өтіңіз.
