Аламанның алғашқы күні мәдени кешке арнайы қатысқан Мәжіліс спикері Ерлан Қошанов Мемлекет басшысы Қасым-Жомарт Тоқаевтың еңбек адамының мәртебесін көтеруді үнемі айтып жүргеніне ерекше назар аударып, Республика күні қарсаңында 700-ден астам қарапайым еңбеккерді мемлекеттік наградамен марапаттағанын атап өтті. Бұл адал да табанды жұмысымен Тәуелсіздігіміздің тұғырын бекемдеп келе жатқан азаматтарымызға деген құрмет екенін атап өтті.
«Биылғы «Алтын домбыра» ақындар айтысының өзіндік мәні бар. Онда еңбек адамдарының өнегесі өзек болды. Себебі береке мен молшылықтың бастауы – еңбекте. Ал оның иесі де, киесі де – қарапайым еңбек адамдары. Осы ретте Мемлекет басшысы «Адал азамат» ұғымын қоғам санасына сіңіруді ұсынды. Айналып келгенде, мемлекетті мемлекет, елді ел қылып отырған бай-бағландар емес, қатардағы жұмысшылар, малшылар, диқандар, ұстаздар мен дәрігерлер. Қазір оларға деген қоғамның шынайы құрметі айрықша», деді Е.Қошанов.
Айтыс тізгінін ұстаған белгілі ақын, Мәжіліс депутаты Аманжол Әлтай көпшілік көрерменге қазылар алқасының құрамын және ақындар қауымын таныстыра келе: «Айтыс – ұрпақтан-ұрпаққа әкенің қаны, ананың сүтімен жеткен қастерлі өнер. Бүгін елорда төрінде еңбек адамының қадір-қасиетін, олардың қоғамдағы айрықша орнын жырға қосамын деп ойы өрелі, сөзі сүбелі айтулы ақындар бас қосып отыр. Баршаңызға сәттілік тілеймін», деді.
Екі күнге созылған аламан айтыста еліміздің түкпір-түкпірінен жиналған 16 ақын өнер көрсетіп, кіл жүйрікте кім жүйрік екенін анықтады. Жарыс соңында дәстүрлі доданың мәні мен маңызына тоқталған «Amanat» партиясының атқарушы хатшысы Дәулет Кәрібек партия тарапынан алдағы уақытта да мәдениет пен өнерге барынша қолдау көрсетіле беретінін жеткізді. «Мемлекет басшысы Қасым-Жомарт Тоқаев еңбек адамының мәртебесін көтеруді үнемі айтып келеді. Есілдің жағасында екі күн бойы ерекше өнер көрсеткен ақындарымыз еңбек адамының абыройын асқақтатып, олардың ел дамуына қосып жатқан өлшеусіз үлесін жырға қосты. Елді көркейтетін – еңбек. Айтыс деп аталатын асыл өнеріміз төрден түспесін», деді ол.
Өз кезегінде Мәдениет және ақпарат вице-министрі Арман Жүдебаев жыр додасын тамашалауға келген қалың көрермен мен ақындар қауымына шынайы алғысын білдірді. «Қазақ халқы ежелден айтыс өнерін жоғары бағалаған. Ел ішіндегі жақсылықты да, кемшілікті де сөз арқылы шебер жеткізіп отырған. Міне екі күнге созылған аламан айтыста біздің арқалы ақындарымыз да өз шеберліктерін ортаға салып, еңбек адамының мәртебесін асырып, мерейін үстем етті. Оларды қолдап, қостап келіп отырған барша айтыссүйер ағайынға рахмет айтамын», деді вице-министр.
«Үндемесем өзіме өзім төре, сөйлеп кетсем өзіме сөзім төре», дейді қазақ халқы. Сол сөзге бүгін әділ бағасын берген қазылар алқасының ары таза деген ойдамын. Күміс көмейінен жақұттай жыр төккен ақындарымызға шалқар шабыт тілеймін. Ұлттық өнеріміздің беделі биік, абыройы асқақ болғай», деген қазылар алқасының төрағасы, Қазақстанның халық ақыны Әсия Беркенова ақындардың өнерін бағалауда әдептен озбай, ардан аттамай әділ шешім болғанын атап өтті.
Осылайша қазылар алқасының шешімімен жарыстың бас жүлдесін қарағандылық ақын Мақсат Аханов иеленіп, оған «Алтын домбыра» мен автокөлік табысталды. Ал жүлделі 1-орын және «Айтыс ақтаңгері» атағы қызылордалық Мейірбек Сұлтанханға, 2-орын павлодарлық Аспанбек Шұғатайға бұйырды. 3-орынды ұлытаулық Төлеген Жаманов пен Батыс Қазақстан облысынан келген Жансая Мусина өзара бөлісті.
Сондай-ақ, жамбылдық Алина Айдаралы, Батыс Қазақстан облысының айтыскері Мұрадым Мейрланов және алматылық Шұғайып Сезімхан арнайы жүлде иеленді. Сайысқа түскен барша ақынға қомақты сый-сияпат табысталды.
