Облыстың шағын және орта кәсіпкерлік субъектілерінің 32 пайызында әйелдер жетекшілік етеді. Яғни әйелдердің іскерлік бастамаларына қолдау көрсету, құқықтары мен мүмкіндіктерін кеңейту, оларға қатысты жасалатын зорлық-зомбылықтың алдын алу жергілікті биліктің басты назарында болуы заңдылық.
Түркістанда өткен облыстың барлық аудан, қаласынан қоғам белсенділері санатындағы нәзік жандар қатысып, еліміздің жаңа саяси мәдениеті шеңберінде әйелдердің қоғамдағы рөлін ілгерілету мәселелері қарастырылған жиында демографиялық өсімі жоғары өңірде ана мен бала құқығын қорғау басты міндет екені де айтылды. Жиында облысқа жұмыс сапарымен келген «Amanat» партиясының хатшысы Шолпан Каринова партия әйелдердің мемлекеттік басқаруға және инклюзиялық қоғам мен гендерлік паритетті қалыптастыруға белсенді қатысуын кеңейтуде Әйелдер қанатын құру жөнінде бастама көтергенін мәлімдеді. Әйелдер қанатын құру және оның қызметі әйелдердің күн тәртібін ілгерілету мәселесінде партияның әлеуетін нығайтуға серпін беретінін атап өтті. «Әйелдер қанатының жұмысы әйелдердің әлеуметтік, құқықтық және басқа да өзекті мәселелерін шешуде үлкен тәжірибесі бар, партия мүшелері болып табылатын танымал, беделді әйелдердің қатысуымен он басым бағыты бойынша жүргізіледі. Оның ішінде тұрмыстық зорлық-зомбылық құрбаны болған әйелдерді қолдау, ауылдағы әйелдердің арасында кәсіпкерліктің дамуына жәрдемдесу, ғылымдағы нәзік жандарды қолдау, жаңадан қабылданатын заң жобаларына гендерлік сараптама жүргізу және қоғамда әйелдердің құқықтары мен мүмкіндіктерін кеңейту бойынша басқа да өзекті мәселелер», деді Шолпан Таңатқызы.
Ал «Amanat» партиясы Түркістан облыстық филиалының төрағасы, облыстық мәслихаттағы фракция жетекшісі Алтынсары Үмбетәлиев өңірде әйел-аналардың саяси белсенділігі артып келе жатқанын жеткізді. Облыстағы 82 мыңнан астам партия мүшесінің 66,6 пайызы, облыстық мәслихат құрамының 13 пайызы әйелдерден тұратынын айтты. Сондай-ақ жиын барысында Шолпан Каринова партияның облыстық филиалы жанындағы әйелдердің құқықтары мен мүмкіндіктерін кеңейту мәселелері жөніндегі кеңесшісі болып облыстық партия филиалы атқарушы хатшысының орынбасары, облыстық мәслихат депутаты Қалыйма Жантөреева тағайындалғанын хабарлады.
Жиында ғылымдағы әйелдерді қолдау шаралары жөнінде Қ.А.Ясауи атындағы ХҚТУ ректоры Жанар Темірбекова, әйелдерді мемлекеттік қолдау және жұмыспен қамту туралы облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева, әйелдердің кәсіпкерлік бастамаларын қолдау бойынша «Атамекен» ҰКП өңірлік кәсіпкерлер палатасы директорының орынбасары Нұрбол Рысбеков баяндама жасады. Сондай-ақ қатысушылар әйелдердің саяси көшбасшылығын дамыту мен ілгерілетуге бағытталған ұсыныстарын білдіріп, өзара пікір алмасты.
Түркістан облысы